CEBU, Philippines - Ang Mandaue City moparada sa ilang pito ka dekalibreng boksidor karong edisyona sa bi-monthly Summit Natural Drinking Water Fight Night Amateur Series diha sa Gaisano Country Mall carpark.
Magsilbe kining tune-up alang sa pambato, kinsa nagtinguha sa overall title sa umaabot nga ABAP Visayas Championships.
Dakung pressure ang gipas-an sa Mandaue tungod kay gawas nga nangharus sila sa miaging ABAP tournament didto sa Palawan, sila usab ang nagkupot og homecourt advantage alang sa regional championship karong Oktubre 26 diha sa Mandaue City Cultural and Sports Complex.
Ang mga pambato sa Mandaue nga mopakita'g aksiyon karong gabii mao sila si Kevin Jake Cataraja (46 kgs) batok Christian Bacolod sa Mabolo, Danlou Codilla ug Reoxyl Tabogon (48 kgs) batok nilang Reyboy Pepito sa Florencio Uro ug Richard Barrios sa Bais, Michael Romarate (52 kgs) batok ni Jerome Baja, Christian Apawan (56 kgs) ug Mark Bernaldez (60 kgs) batok Ryan Cagatulla ug Rodel Wenceslao sa PABC ug si Melvin Besinga batok Rhyan Canillas sa Toledo City.
Lain pang mga away karong adlawa mao ang sangka tali nilang Joerich Ricarte sa Banilad batok ni Polid Banal sa Cabancalan (36 kgs), Elecio Taruc sa Lapu-Lapu batok ni Reymund Namucatcat sa Mabolo, Cherwellan Cantel sa Maguikay batok ni Richie Montealto sa Consolacion ug Rie Munez sa University of the Visayas batok ni Jefferson Co sa PABC ug ang iyang teammate nga si Robert Etorma moharong ni Denny Galaskin sa 66 kilograms division. – BANAT NEWS