Pulpogan abante sa semis
CEBU, Philippines - Gihabwa sa Pulpogan ang tanan nilang kusog sa daginutong oras sa final period aron makaipsot sa kulbahinam nila nga duwa batok Casili, 74-70 sa Inter-Barangay division sa 2010 Mayor Teresa Pepito Alegado Cup Consolacion Fiesta Basketball League didto sa Consolacion Sports Complex.
Miagi pa og kalisud ang Pulpogan sa wala pa nila masakmit ang daog.
Nilabaw ang Pulpogan og uno punto human maposa ang tres ni Tudtud sa katapusang dos minutos sa duwa ug wala na nila buhi-i pa ang momentum aron seguradong mahisulod sa semifinals.
Sa Association of Barangay Councils (ABC) category, si Rullen Cabahug sa Brgy. Tilhaong mirehistro og career-high 38 puntos aron baswaton ang Cantipula (Cansaga-Tilhaong-Pulpogan-Lamac) ngadto sa 84-68 nga kadaugan batok sa PPCLG (Panas-Panoypoy-Cabangahan-Lanipga-Garing).
Gikan sa uno punto nga labaw sa first-period, 20-19, ang Cantipula mipaburot sa ilang labaw ngadto sa 41-34 sa halftime. Nakontrolar sa Cantipula ang siyete puntos nga labaw, 61-54 sa second half, sa wala pa sila milusad og bangis nga rally aron ilubong og 16 puntos ang ilang PPCLG.
Ang duha ka buwan nga liga gipadagan ni sports director Nilo Ferraren, executive committee chairman Julius Alegado, ABC president Gelio Maquilan ug SK Federation chairperson Madel Hyacinth Herrera.
Gipaluyohan kini ni tournament commissioner Paul Alelu Q. Flores uban sa suporta sa iyang deputy nga si Aurelio Eslawan. (BANATSPORTS)
- Latest
- Trending
