CEBU, Philippines - Mibalik na sab sa finals ang University of Cebu (UC) Webmasters human sila moharos sa semifinals sa labing unang higayon sa Cebu Schools Athletic Foundation, Inc. (CESAFI), apan walay laing kausaban tungod kay mag-abot gihapon sila batok sa nine-time champion University of the Visayas (UV) Green Lancers alang sa "besf-of-five" championship showdown sa collegiate division sugod karong Huwebes diha sa Cebu Coliseum.
Ang Webmasters mibawos gikan sa ilang 79-82 nga kapildihan ngadto sa Lancers sa eliminasyon pinaagi sa pag-iskor og 68-63 nga kadaugan niadtong Domingo. Ang maong duwa halos gikontrolar sa Webmasters gawas lang sa third period diin ang Lancers milusad og 11-0 run aron pagposte og 51-48 nga labaw.
Hinuon, bisan pa sa maong kapildihan, ang Lancers mi-abante lang gihapon sa finals.
Matagak unta ang Lancers sa labing unang higayon kun ang kadaugan sa University of San Carlos (USC) Warriors batok sa Southwestern University (SWU) Cobras niabot pa og 12 puntos, apan ang Warriors igo lang nakahimo og 86-76 nga kadaugan.
Kun napilde pa ang Lancers, mahitabo unta ang triple uban sa Cobras ug sa Warriors, apan nidaog man sila og 11 puntos batok sa Warriors, sila ang nakakuha sa labing taas nga quotient.
Walay nakaugpo ni 6'-foot-9 Junemar Fajardo ug ang tanang midepensa kaniya nabutang sa foul trouble. Si Fajardo maoy nangu sa opensa sa UC pinaagi sa iyang 21 puntos, gisundan ni Luigi Bercede nga adunay 10 puntos.
Ang torotoy nga si John Michael Abad, mao sab ang topscorer sa UV nga mipupo og 18 puntos, samtang sila si Eman Calo ug Ralf Olivares miabuno og 10 puntos matag usa.
Sa sayo pa, si Mark Gil Panerio mibahog og 21 puntos aron pangulohan ang Warriors, samtang sila si Giovanni Padillo ug Sam Hermosa miamot og 20 puntos matag usa.
Si Rene Pacquiao mihakot og 18 puntos aron sab pangulohan ang Cobras. Sila si Arrd Diango ug Eleazar Armecin parehong mitampo og 16 puntos.
Puntos Matag Usa
Unang duwa:
USC (86) - Panerio 21, Hermosa 20, Padillo 20, Codilla 10, Cantonao 5, Otida 5, Cortes 2, Uy 2
SWU (76) - Pacquiao 18, Armecin 16, Diango 16, Litorja 13, Maguate 10, Pria 2, Ortuyo 2
Ikaduhang duwa:
UC (68) - Fajardo 21, Bercede 10, Juliane 8, Ampoon 8, Mohammad 7, Heruela 7, Pao 6
UV (63) - Abad 18, Olivares 10, Calo 10, Lao 8, Cincoflores 5, Saycon 4, Mercader 4, Avillanoza 2, Silva 2 (BANAT NEWS)