CEBU, Philippines - Giangkon sa Poblacion Oriental ang solong liderato sa bracket A dihang ilang gipilde ang Pitogo, 85-72 sa Inter-barangay division sa 2010 Mayor Teresa P. Alegado Cup Consolacion Fiesta Basketball League didto sa Consolacion Sports Complex.
Sikit ang duwa sa unang duha ka kuwarter, apan usa ka 10-0 run ang gipabuto sa Poblacion aron makuha ang 15 puntos nga labaw sa third period, 62-47.
Miaksiyon og gukod ang Pitogo ug ilang napahakan ang labaw ngadto sa tres puntos, 65-68 sa nahibiling 4:35 sa duwa, apan nakawang kini dihang napasulod ni Junnix Flores ang duha ka krusyal nga tira nga maoy milansang sa daog alang sa Poblacion Oriental.
Ang managsuong Larry ug Lemuel Malagar maoy nangulo sa Poblacion nga nagkumboya og 26 puntos.
Sa Association of Barangay Councils (ABC) category, ang San Narciso mihaw-as sab og daog batok sa TOORN (Tugbongan-Oriental-Occidental-Nangka) sa iskor nga 78-72.
Ang duha ka buwan nga torneyo gipasiugdahan ni executive committee chairman Julius Alegado, sports director Nilo Ferraren, Association of Barangay Council (ABC) president Gelio Maquilan ug SK Federation chairperson Madel Hyacinth Herrera. Ang technical gidumala ni sports commissioner ug kanhi FEU Tamaraws cager Paul Alelu Q. Flores.
Puntos Matag Usa
Unang duwa:
San Narciso (78) - Masamoc 26, Jairus 23, Ibones 16, Capangpangan 5, Eduyan 4, Mondarte 2, Alinsunod 2
TOORN (72) - Casul 28, Congson 22, Boyles 8, Tibon 7, Napuli 5, Abinales 2
Ikaduhang duwa:
Poblacion (85) - La.Malagar 14, Le.Malagar 12, Medida 12, Cañete10, Malagar Lo.7, Alinsug 7, Jorge 6, Cejas 5, Flores 6, Tuburan 2, Lada 2, Lond. Malagar 2
Pitogo (72) - A. Maglasang 14, B. Maglasang 12, Villanueva 11, C. Maglasang 8, Pepito 8, D. Maglasang 6, Nillas 5, Quiñahan 4, Puao 3, E. Maglasang 1 (BANAT NEWS)