CEBU, Philippines - Mibugwak og mga puntos ang Cebu Eastern College (CEC) Dragons sa final period aron motiklo og come-from-behind nga kadaugan, 92-81 batok sa University of Cebu (UC) Webmasters ug ingon man usab maangkon ang 2-0 nga baraha sa 10th Cebu Schools Athletic Foundation Inc. (CESAFI) semifinals kagabii diha sa Cebu Coliseum.
Human mabiyai og singko puntos, 59-64, nanginit ang Dragons human nila giangkon ang katapusang period pinaagi sa ilang nagbagang opensiba aron dauban ang Webmasters.
Bisan og hayag na ang ilang gidamgo nga lingkoranan sa finals, nagmakuli gihapon si Dragons coach Jerry Jaranilla ug kaubanan sa coaching staff nga maneguro tungod kay posible pa nga mosangpot sa usa ka triple tie ang standing kun ugaling mapilde sila sa Sacred Heart School-Ateneo ug modaog usab ang UC batok sa UV Lancers karong adlawa.
Si Nike Montalvo maoy gisandigan sa opensa sa Dragons sa iyang 23 puntos, gisundan nila ni Benjamin James Zosa ug Roy Villarias kinsa miposa og 15 puntos matag usa.
Naglabaw ang Dragons sa third period, apan sayo silang nasulod sa penalty nga gipahimuslan sa UC pagpangulo ni Alvin Labolabo Jr. kinsa mirehistro og game-high 31 puntos.
Sa sayo pa, ang Sacred Heart School-Ateneo de Cebu (SHS-AdC) Magis Eagles mipalagpot sa University of the Visayas (UV) Baby Lancers, 87-83, salamat sa paningkamot ni Adven Jess Diputado, kinsa mipasulod sa krusyal niya nga tira sa nanghinapos nga bahin sa overtime.
Si Diputado miayag og 20 puntos, samtang si Adrian Roland Muller ug Bradley Bacaltos mitampo og 21 puntos matag usa aron maangkon ang 1-1 win-loss record.
Ang natagak nga Baby Lancers gipangulohan ni Vincent Mendoza, kinsa midukdok og 25 puntos.