CEBU, Philippines - Nagmangtas ang bangis nga University of Cebu (UC) karatekas aron sakmiton ang overall title sa Cebu Schools Athletic Foundation Inc. (CESAFI) karatedo tournament diha sa University of San Jose-Recoletos (USJ-R)-Basak campus gym.
Ang UC mikabkab og 21 ka gold, ug tag-usa ka silver ug bronze alang sa titulo sa seniors division.
Si Ann Marie de la Riarte maoy nangulo sa UC pagkubkob sa ilang bulawan human gidominar ang individual kata ug 50 kg. individual kumite.
Sa laing bahin, si Samuel Orillo maoy naghari sa men's division, samtang ang iyang teammates nga sila si Adam Enopena ug Arthjon Rosaroso, mi-okupar sa ikaduha ug ikatulo nga mga dapit.
Ang tulo mihipos sab og mga bulawan sa individual kumite uban ni Orillo sa 55 kgs., Enopena sa 60 kg. ug Rosaroso sa 67 kg.
Kadaghanang bulawan sa UC napunta ngadto sa team events. Ang UC men ug women's squad nanghawod sab sa team kata ug team kumite. Ilang gipilde ang USJ-R ug ang University of the Visayas (UV).
Si De la Riarte maoy nangu sa UC women's sa team kata ug team kumite uban nilang Lorraine Mae Parrotina ug Mary France Danuhan.
Samtang sila si Orillo, Enopena ug Rosaroso mao sab ang ang nangu sa men's team kata. Si Rosaroso giduyogan sab nilang Romnick Russel ug Concan Villar sa ilang kadaugan sa team kumite. (BANATSPORTS)