Mandaue mo-host sa ABAP regional tourney

CEBU, Philippines - Panahon sa dakbayan sa Mandaue nga mopatik og kasaysayan sa amateur boxing dinhi sa nasud gumikan kay sila maoy napilian nga mo-host sa Amateur Boxing Association of the Philippines (ABAP) Visayas regional championship karong Oktubre 26-30 diha sa Mandaue City Cultural and Sports Complex.

Atol sa press conference sa miaging gabii diha sa Yayoy’s Grill and Restobar, si ABAP Executive director Ed Picson nagkanayon nga mismo si Mandaue Mayor Jonas Cortes maoy mihangyo nga adto sa ilang siyudad ipahigayon ang labing dakung amateur boxing event sa Kabisay-an.

Adunay 32 ka koponan gikan sa 10 ka nagkadaiyang probinsya ug siyudad sa Visayas ang mosalmot sa lima ka adlaw nga torneyo nga mosubay og knockout elimination format. Ang mapilian ipadala ngadto sa Manila aron masakop sa national training pool.

Matud pa ni Picson nga nagkinahanglan gihapon ang national team og dugang 50 ka mga boksidor isip preparasyon sa nagsingabot nga international tournaments, lakip na ang Olympics.

Sa pagka karon aduna pay 37 ka mga aktibong boksidor ang nag-train ubos sa national pool nga gisuportahan sa Smart Communications ug PLDT ni sports patron Manny V. Pangilinan.

"Nangita mi'g mga Bisaya nga boksidor nga makapalig-on sa atong line-up sa mga international tournaments," matud ni Picson.

Gawas sa host Mandaue boxing team, laing local teams nga moapil sa maong torneyo mao ang ALA stable ug Team Cebu City nga langkuban sa mga boksidor sa Cebu City Sports Center (CCSC) stable ug Omega Boxing Gym. (BANATSPORTS)