CEBU, Philippines - Nakahatag og dungog si Joeyry Lee sa iyang katagilungsod dihang iyang gipilde ang beteranang si Christy Sevilleno-Tutor aron dominahon ang 10K women's division sa 1st WCIP Balamban Fiesta Run didto sa lungsod sa Balamban.
Tungod kay kabisado na niya ang rota, si Lee sayon kaayong milabang sa finish line nga mi-oras og 43 minutos ug 45 segundos. Si Sevilleno-Tutor, mi-oras og 46:16 alang sa ikaduhang dapit.
Laing taga-Balamban nga si Mereeis Ramirez maoy mi-okupar sa ikatulong dapit sa oras nga 46:37.
Sa men’s class, si Riez Enriquez maoy naghari nga nag-una lang og uno segundo batok ni 34th Milo Marathon Cebu-leg champion Adonis Singson. Gilabang ni Enriquez ang finish line sud lang sa 36.14, samtang si Singson mitapos sa oras nga 36:15. Si Ian Bernido maoy third placer sa oras nga 37:37.
Sa iyang bahin, si Joel Delposo midominar sa 5K men’s division sa oras nga 19:12, gisundan ni Meljun Luterte (19:15) sa ikaduha ug Adrian Agang (19:25) sa ikatulong luna.
Wa usab magpauwahi ang managsuong Diongson dihang ilang giangkon ang una ug ikaduhang mga dapit.
Si Clarrise maoy mikampiyon sa oras nga 20:48, samtang si Crizel maoy second placer sa oras nga 24:11. Mipuwesto sa ikatulo si Merlita Arias-Dunkin sa oras nga 24:20.
Ang top three finishers sa 3K men’s division mao sila si Leo Abello (8:51), Ramie Lawas (8:58) ug Roy Villahermosa (9:02), samtang sila si Kresha Mae Ygot (11:30), Kimberly Anne Ygot (11:57) ug Aizel Campilan (12:02) sa women’s class. – BANAT NEWS