Golf for a cause

CEBU, Philippines - Ang buwan sa Oktubre gi-ilang Cancer Prevention Month ug kalabot sa pagtamud niini, adunay golf tournament nga ipahigayon isip fund-raising drive nga gipasiugdahan sa service-oriented nga Rotary Club of Cebu Fuente uban sa pag-abag sa Chamber of Customs Brokers, Inc. (CCBI).

Usa kini ka dalaygon nga proyekto nga angayan gyud suportahan sa mga golfing buffs dinhi sa Sugbo tungod kay ang pundo nga matigum niini adto ihandos sa Chong Hua Hospital-Surgery Department diin didto gi-atiman ang mga pasyente nga adunay breast cancer. Anaa mahimutang ang mga bag-ong ekipo usa na niini ang makina nga maoy mosusi sa ‘suso” sa tawo nga magpa-ilawon sa mammography.

Ang nakapakulba niining breast cancer mao nga dili lang diay mga babaye ang maka-angkon sa maong makamatay nga sakit kung dili hasta sab mga lalaki sumala pa sa mga pagtuon sa mga medical experts.

Ang golf tournament gitawag og 2nd Pink Tee Golf tournament nga pagahimoon karong umaabot Oktubre 8 didto sa Cebu Country Club golf course sa Banilad. Gidapit ang tanang mga mahiligon sa golf dinhi sa Sugbo sa pagsalmot ingon man kadtong mga amateur golfers sa silingang dapit sa Visayas ug Mindanao.

Gihimong pormal ang paglusad sa maong proyekto atol sa usa ka press conference didto sa opisina ni Port of Cebu District Collector Atty. Ronnie C. Silvestre nga gitambongan sab sa mga sakop sa organizing/working committee nga naglakip kang Rady Abarintos, ang hepe sa Cash Division ug Immediate Past President sa Rotary Club of Cebu Fuente, Jessie Baring ang RCC Fuente President, Dinna Ramos, ang President-Elect, May Ann Alcordo, Alfredo Lanticse, ang presidente sa CCBI ug Ding Abay-abay ang kanhi presidente sa CCBI.

Atong suportahan kining maong proyekto dili lang sa sulti kung dili sa buhat usab. Aduna pay laing mga kalihokan sa sports nga gipasiugdahan sa Rotary Club of Cebu Fuente sumala pa ni Alcordo. Tanan nilang proyekto adunay mga kabus nga makabenipisyo.

Atong lakbitan kining cancer. Tungod niining pulong nga cancer, makahinumdom ako sa usa ka komedya nga kalabot sa usa ka househelper ang gipangutana sa asawa sa iyang master o “amo” kung nganong midako ang iyang tiyan. Mitubag ang househelp nga Kan-Sir ni Mam. Mitubag ang asawa unsay Kang-Sir? Kan-Sir ba, kang Sir ni anak tubag sa katabang. Joke3x pakatawa lang.

* * *

Naghisgot man gyud kita og rotary, laing club nga mao ang Rotary Club of Cebu South nga gipangulohan sa ilang presidente nga si Atty. Mag Gordon mipahigayon sad ug laing kalihokan ug kini mao ang duwa tali sa San Miguel Beer vs. CESAFI All-Star Selection didto sa Cebu Coliseum diin midaog ang Beermen sa iskor, 79-61. Didto sa press con ang mga sakop sa working committee nga sila si Weng Moras, Juvy Yucot, Louisa Pumatong, Joey Nolasco ug Pat Niñal sa Timex Philippines. Ang maong kalihokan gi-abagan sab sa MEPZCEM ilabi na ang mga kadagkoan sa Timex nga usa sa misalmot karon sa Inter-Company Sportsfest nga adto pa matapos sa Nobiyembre 14.

Kauban ni sa Sugboanong basketball star nga si Dondon Hontiveros, didto ang mga tigpasiugda sa duwa sa Vanille resto sa miaging adlaw alang sa usa ka inato lang nga press conference diin nagpahulagway ang mga local sportswriters kauban sab si Dondon.

* * *

Padayon karon ang tinuig nga Association of Regional Executives in National Agencies (ARENA-7) Sportsfest ug ang usa sa mga events mao ang basketball diin ang mga duwa adto ipahigayon sa CENTCOM covered court sulod sa Camp Lapulapu didto sa barangay Apas, Lahug.

Pabiling walay pilde ang defending champion Land Transportation Office (LTO) nga wala pay pilde sa Group A samtang ang Court of Appeals mao sab ang leader sa Group B nga naglakip sa mga mosunod nga teams; host organizer BIR, Bureau of Customs, DOE, CTU, CNU, DOJ, DOH, DOST, LTO, Ombudsman, Quedancor ug PDEA.

Miscellaneous. My friend Mr. Mike Sususco, the finance officer of the San Miguel Shipping and Lighterage Corp. celebrates another milestone today, September 27. May you have so many more birthdays to come, Boss. (BANATSPORTS)