M.O. Plus Run 2010 pormal nga gilusad

CEBU, Philippines - Gumikan sa padayong pagsulbong sa lumba sa dagan dinhi sa Sugbu, laing kompaniya ang mopasiugda sa ilang kaugalingong lumba nga uloha'g 'M.O. Plus Run 2010: Labanan Ang Malnutrition" karong Nobiyembre 21 diha sa Asiatown I.T. Park sa Brgy. Apas, ning siyudad.

Mikompisal si Luigi Sanchez sa J. Nissi Bioherbs Incorporated nga lahi ang ilang lumba itandi sa mga nangaging awareness run nga gipahigayon dinhi sa Sugbu tungod kay inig human sa lumba, adunay ipakitang video presentation ug lecture aron maleksiyon ang mga tawo sa kamahinungdanon sa maayong paglawas.

"We design it not only for the running enthusiasts but also to the families to educate them about malnutrition," matud pa ni Sanchez sa gihimong press conference kagahapon sa buntag didto sa Casino Español.

Atol usab sa presscon, gipaila sa Nissi Bioherbs Incorporated ang ilang mga produkto -- ang M.O. Plus, all natural multi-vitamins nga puno sa malunggay. Ang malunggay giingong usa sa pipila ka herbs nga nagda'g bitamina gikan sa A hangtod sa Z.

Ang Children's Hour Foundation maoy beneficiary sa maong kalihukan.

Sa iyang bahin, gilauman ni race director Kenneth Casquejo   nga moabot og 2,000 ka mga runners ang mosalmot sa lumba nga gibahin sa tulo ka kategoriya —15K, 5K ug 3K fun run.

Ang registration fee nagkantidad og P300 alang sa 3K ug 5K run, samtang P400 alang sa 15K. Ang registration sugdan sa Oktubre 15 ug motapos sa Nobiyembre 18 diha sa Cebu City Sports Center ug sa Ayala Active Zone.

Ang M.O. Plus users mahimo sab nga mogamit sa empty boxes isip registration fee o mokuha og rebate nga P20 matag sudlanan. – BANAT NEWS