Medalle bag-ong kampiyon

CEBU, Philippines - Gilupig ni kanhi USJ-R Baby Jaguars point guard Ernesto 'Baeng' Medalle Jr. ang lig-on niyang mga kaatbang aron mao na karon ang ilhong 3-point shootout king sa F. Llamas Youth Association (FYA) All-Star Game niadtong Martes diha sa Vicente Sotto Memorial Gym sa Brgy. Punta Princesa, ning siyudad.

Si Medalle mihipos og 12 puntos nga igo na kaayo sa pagpalagpot ni defending champion Michael Garcia sa Angelica team ug Bornong Endrina sa Leo & Rolly squad.

Ang playing coach sa topseed Viking Haulers, mipilde sa pito niya ka kaatbang human makakuha'g 15 puntos atol sa eliminasyon.

Sa laing bahin, si Jaime Atuel maoy gikoronahan isip bag-ong kampiyon sa buzzer-beater nga gihuptan kaniadto ni Eking Marata. Si Marata   natagak dayon sa first round.

Sa two-ball competition, ang Cueme-Tabada tandem sa Angelica team maoy kampiyon human mokamada og 27 puntos.

Sa preliminary game, ang FYA Rookies mimakmak sa Sophomores sa iskor nga 83-65, samtang ang Light team midaog sab batok sa Dark team sa iskor sa 94-88.

Ang Rookies gilangkuban sa mga magduduwa gikan sa Viking, Simpolang Barbekyuhan, CRV ug Leo & Rolly. Ang Sophomores gilangkuban sa mga players gikan sa Heartfelt, Park ‘N Go Bakeshop, Kharos ug Angelica.

Sa laing bahin, ang Light team gilangkuban sa mga players gikan sa Heartfelt, Park ‘N Go, Kharos ug sa Angelica, samtang ang Dark team gisalmotan sa mga pambato sa Viking, Simpolang, CRV ug Leo & Rolly.

Si Chrissar Llegunas, kinsa maoy nango sa Light team sa iyang 12 puntos maoy napiling MVP, samtang si Dondon Cadungog nga usa ka contender sa maong pasidungog, mao sab ang nangu sa Dark team nga adunay 16 puntos.

Puntos Matag Usa

Unang duwa:

Rookies (83) - Labrador 18, Albarracin 14, Endrina 11, Sabalande 10, Abella 8, Pacaña 7, Rosaseña 5, Cañete 3

Sophomores (65) - Bahina 23, Edz 14, Osorio 8, Dela Cerna 7, Lañojan 7, Villorden 4, Guy 2, Tolentino 2

Ikaduhang duwa:

Light (94) - Llegunas 12, Laborte 11, Caballero 11, Lopez 10, Arias 9, Atuel 9, Tabada 8, Rama 6, Basalo 4, Patalita 3, Reubal 2

Dark (88) - Cadungog 16, Tabar 9, Abellana 8, Antiporta 7, Sonsona 7, Canceko 6, Aglipa 6, Banzon 6, Villaver 6, Laborte 6, Tabares 5, Limbaga 4. – BANAT NEWS