lto miligis sa philhealth sa arena-7

CEBU, Philippines - Giligsan sa Land Transportation Office (LTO) ang Philhealth diin gipakita sa defending champion kung unsa sila kabangis pinaagi sa paglampurnas sa Philhealth sa iskor, 100-85 kaniadtong Biyernes atol sa nagpadayong Association of Regional Executives in National Agencies (ARENA-7) 2010 basketball tournament didto sa CENTCOM covered court sa barangay Apas, Lahug, ning dakbayan.

Mao pa lang kadto ang unang duwa sa LTO kinsa naghupot karon og 1-0 nga baraha. Sila maoy defending champion sa maong torneyo.

Sikit ang unang period dihang nagtabla sila sa 22-all ug nagtabla sab sila atol sa halftime sa parehong 42.

Hinoon nagsugod pagmangtas ang LTO sa third period diin ilang na-outscore ang Philhealth, 26-20 ug padayon silang naglabaw hangtod na sa fourth period diin didto ilang gitiwasan ang ilang kaatbang.

Naglabaw sab gihapon og sayis puntos ang LTO, 68-62 sa third period pinaagi sa pagduslit ug rally nilang Jun Ace Ursal ug Sherwin Abobo.

Misalga sab dayon sa opensa silang Milfred Sampelo ug John Bargamento aron mohimo’g 32-22 nga scoring run sa nahibiling pipila ka minutos sa fourth quarter ug wala na maka-apas ang Philhealth.

Si Ursal maoy nangu sa LTO sa iyang 35 puntos ug sila si Sampelo ug Abobo mibahug og 23 ug 17 puntos, matag usa ug si Bargamento midugang og 10 puntos.

Ang mga ex-USPF Panthers nga sila si Elvis Labares ug Arletroy Mercader maoy nangu sa opensa sa Philhealth—si Labares misakmit og 30 puntos ug si Mercader may 16 puntos ug sila si Aris Jayme ug Eric Relampagos may 12 ug 10 puntos, matag usa.  (BANATSPORTS)