Female runners mobida sa Glam Run

CEBU, Philippines - Bida karong buntaga ang female runners nga mosalmot sa St. Theresas College (STC) –Glam Run diha sa The Terraces sa Ayala Center-Cebu.

Gawas sa naandang 10K, 5K ug 3K, ang organizers molakip usab og 1.6K category alang sa mga beginners sama sa mga kababayen-an nga gustong mosuway og dagan isip ehersisyo.

Tungod kay masentro sa running ug fashion ang maong lumba, usa ka retouch station ang ibutang sa dayong abot sa finish line aron magpabilin ang kaanyag ug postura sa female runners human sa ginukdanay.

Apan sukwahi sa tema sa maong lumba, seryusong kompetisyon ang masaksihan sa 10K women’s division tali sa mga elite female runners sa Sugbu sama nila ni Mary Grace Delos Santos, Mary Joy Tabal ug Madelyn

Carter.

Dili usab pauwahi ang mga kalalakin-an nga magginukdanay sa men’s open. Lakip sa mga managan mao si Milo Marathon top finishers Adonis Singson ug Joebert Carolino.

Dul-an sa 1,500 runners ang kompirmadong managan karong buntaga nga magsilbe usab nga fund-raising event alang sa Antonio De Oviedo Center Cebu, usa ka foundation alang sa mga kababayen-an nga biktima sa pagpangabuso.