Kulbahinam nga aksiyon sa semifinals sa Milo BEST SBP Passerelle Twin Tournament

CEBU, Philippines - Kulbahinam nga aksiyon ang mahitabo uban sa defending champions Sacred Heart School-Ateneo de Cebu (SHS-AdC) ug University of San Carlos (USC) nga mosugod sa ilang kampanya pagdepensa sa tagsa-tagsa nila ka titulo sa pagsugod sa playoffs sa Milo BEST SBP Passerelle Twin Tournament karong adlawa diha sa CEC gym.

Ang SHS-AdC moharong sa USC-South sa crossover semifinals sa Passerelle division, samtang ang USC-South makigtigi sa Cebu Eastern College (CEC) sa Small Basketeers Philippines (SBP) division.

Ang SHS-AdC maoy topnotcher sa Group-A sa Passerelle division uban ang limpiyong 4-0 nga baraha, samtang ang USC-South maoy second-seeded sa Group-B.

Ang trayanggulo nilang Adrian Muller, Rebreb Diputado ug Julius Cadavis gilaumang maoy mangulo sa opensiba. Nanginahanglan hinuon sila og suporta nilang Henry Asilum, RG Araw-araw ug Patrick Go.

Sa pikas bahin, sila si Ian Ortega, Mitchel Antigua ug Daniel Majan maoy mangulo sa opensiba sa USC-South.

Ang lain pang magsangka sa semifinals sa Passerelle mao ang USC-North nga makighamag sa CEC.

Sila si John Pajantoy ug Rey Arnejo maoy mangulo sa opensiba sa USC, samtang ang CEC maglaum nilang Rex Darwin Villarosa, Clifford Acedillo ug Jefferson Roxas.

Sa SBP division, ang USC-South maoy paborito batok sa CEC  ug magsandig kini sa abilidad nilang John Galinato, Mark Berame ug Jean Jacque Antigua.

Magsangka sab ang USC-North ug SHS-AdC sa laing duwa sa SBP division. – BANAT NEWS