Aegis People Support nakaginhawa pa sa 6th Inter-BPO cagefest

CEBU, Philippines - Nakaginhawa pa ang Aegis People Support human nila gipilde ang Teletech Titans, 76-78 aron tablahon ang ilang "best-of-three" finals series, 1-1 sa 6th Inter-BPO basketball tournament diha sa City Sports Club-Cebu gym.

Gipangulohan nilang Jomie Mendez ug Mariel Vincent Barrera ang Aegis People Support nga nagkumboya'g 44 puntos.

Ang Aegis People Support   mirehistro og 23-15 nga labaw, apan si Erwin Abellanosa nanginit aron pangulohan ang 20-14 run aron ilogon sa Teletech ang dos puntos nga labaw, 39-37 sa halftime.

Sa sunod nga kuwarter, sila si Clifford Amarado ug Mendez nagtambayayong aron mopahaguros sa ilang mapintas nga pangatake ngadto na sa final period aron buntogon ang Teletech.

Sila si Mendez ug Barrera gisuportahan sab nila ni Amarado nga adunay 19 puntos ug milangkat og 10 ka rebounds.

Ang pilderong Teletech gipangulohan ni Abellanosa pinaagi sa iyang 23 puntos, samtang sila si Laurenz Sultan, Raul Cabahug IV ug Fidel Tejam Jr. mitampo og 10 puntos matag usa.

Sa laing bahin, si Mendez maoy napiling regular season MVP. Siya maoy nangulo sa Mythical Five uban nilang Jopher Regidor ug Albert Johnston sa Qualfon ug Abellanosa ug Lourenz Limpangog sa Teletech.

Uban pang mga awardees naglakip nilang Tejam Jr. (king of blocks), Reinario Salibay sa Wipro (king of steals), Mendez, Ryan Benlota sa Eperformax (king of rebounds), Gilbeys Cabrera sa Stream Global Teleservices (assists leader) ug Roderick Mangubat sa Stream (scoring champion).

Puntos Matag Usa

Aegis People Support (76) - Mendez 24, Barrera 20, Amarado 19, Roma 5, Rabuya 4, Arriesgado 2, Nayon 2

Teletech (70) - Abellanosa 23, Cabahug 10, Sultan 10, Tejam 10, Dalangin 5, Limpangog 5, Anghay 4, Banua 2, Rodis 1. – BANAT NEWS