Pinuhalay sa CESAFI All-Star Game

CEBU, Philippines - Napulo'g-unom ka 3-point specialists gikan sa walo ka teams ang magpuhalay sa ilang pagka-tirador sa ipahigayong 10th Cebu Schools Athletic Foundation Inc. (CESAFI) three-point shootout nga maoy molamas sa tinuig nga East vs. West All-Star Games diha sa Cebu Coliseum.

Duha ka players matag team sa collegiate division ang mopakita sa ilang kahanas mo-itsa gikan sa three-point area aron ilhon kun kinsa maoy mopuli ni defending champion   Arvin Kim Gomez, anak ni University of Cebu (UC) Webmasters coach Roel Gomez.

Walay makita nga mga acrobats karong tuiga tungod kay walay gustong mosalmot sa Slam Dunk Contest nga buot mobangga ni Elwin Durano sa University of Southern Philippines (USPF) Panthers.

Ang nine-time champion University of the Visayas (UV) Green Lancers mobala sa ilang duha ka pambato nga sila si Elmer Mykiel Cabahug, anak ni coach Elmer 'Boy' Cabahug uban ni Eman Calo. 

Ang Webmasters, kinsa nagtinguha og three-peat human nahimong kampiyon sila si Moncrief Rogado sa 2008 ug Gomez sa 2009, mipili kanilang Kelvin Juliane ug Robinson Mohammad isip ilang kinakusgan.

Ang third-seeded   University of San Carlos (USC) Warriors motuboy sab nila ni Mike Cantonao ug Giovanni Padillo, ang Southwestern University (SWU) Cobras sa laing bahin, mipili nilang Cris Litorja uban sa rookie gunner Gil Wagas.

Ang Cebu Institute of Technology-University (CIT-U) Wildcats representahan nilang Karenrick dela Cerna ug Jose Allan Dimco, usa sa labing underrated forward sa CESAFI karong tuiga.

Sila si Jemar dela Pena ug Jayson Nudalo maoy ibala sa University of San Jose- Recoletos (USJ-R) Jaguars, ang Don Bosco Technology Center (DBTC) Greywolves pagarepresentahan nilang Jonpons Geraga ug Clarito Hernando, Jr. ug ang USPF Panthers mipili nilang Ellison Rivera ug Randy Avila. 

Ang All-Star Games karong Domingo sugdan sa ala-1 sa hapon. – BANAT NEWS