Niños makigbatok sa Alaska, Derby Ace

CEBU, Philippines - Lab-as pa gikan sa ilang makasaysayanong kampiyonato sa Tournament of the Philippines (TOP), ang M. Lhuillier Kwarta Padala-Cebu Niños moatubang na usab og laing hagit batok sa duha ka powerhouse teams sa Philippine Basketball Association (PBA) sa ilang exhibition matches sunod semana.

Ang Niños ni team owner Michel J. Lhuillier ug coach Raul 'Yayoy' D. Alcoseba mosukod sa abilidad sa reigning PBA Fiesta Conference champion Alaska Aces sa Septiyembre 25, sundan sa ilang sangka batok sa Derby Ace Llamados ubos sa pagpangulo ni two-time MVP James Yap.

Ang ilang exhibition matches mosugod sa alas-5 sa hapon diha sa University of San Carlos (USC) main gym.

Sa katapusan nilang exhibition match sa Alaska, wala damha nga usa ka ngil-ad nga aksidente ang nahitabo ngadto ni M. Lhuillier point guard Woodrow Enriquez kay nabunal kini sa sawog nga miresulta sa usa ka cervical injury nga maoy mitapos sa iyang karera sa basketbol.

Apan bisan pa sa makalisang nga hitabo, nakabangon gihapon ang Niños pinaagi sa pagkuha og duha ka top point guard nga sila si Warren Ybañez ug Froilan Baguion gikan sa PBA.

Niadtong Lunes, ang Niños gikoronahan isip kampiyon   sa unang season sa TOP dihang ilang gipilde ang karibal nga MisOr Meteors sa iskor nga 77-75 sa usa ka kulbahinam nga "do-or-die" game diha sa Cebu Coliseum.

Tungod sa padayon nilang pagdominar sa commercial leagues, nagkakusog karon ang hugon-hugon nga mosulod na ang M. Lhuillier sa PBA. Apan si Alcoseba wala mohatag og komento kalabot niini. – BANAT NEWS