MANILA, Philippines - Gumawa ng malaking sorpresa ang host school St. Clare College matapos nilang hiyain ang dating lider na Centro Escolar University, 90-87 upang pahigpitin ang kanilang kapit sa kontensyon sa 10th NAASCU junior basketball tournament sa UM gym Sampaloc, Manila.
Sumandig ang Baby Saints sa mga balikat nina Kenneth Macapulay, Michael Federez at King Barte upang kumawala mula sa mahigpitang labanan nila ng Baby Scorpions at itakas ang kanilang ikawalong panalo matapos ang 12-laban.
Tumapos si Macapulay ng 20 puntos, nagdagdag naman si Federez ng 15 puntos at may 14 puntos rin si Barte para sa St. Clare na nananatiling pinakamainit na koponan bunga ng kanilang limang dikit na panalo.
Nag-ambag rin sina Mating Gil at Ian Paltao ng tig-10 puntos para sa Caloocan City-based Baby Saints.
Tumapos naman si Peter De Ocampo ng game-high 23 puntos para sa Noli Mejos-mentired Young Scorpions na lumasap ng kanilang ikalawang kabiguan makaraan ang 12 laro.
Umagaw rin ng eksena sa panalo ng St. Clare ang Our Lady of Fatima University na tinalo ang AMA Computer University, 95-83 upang makisalo sa liderato sa CEU taglay ang 10-2 win-loss slate sa torneong ito na inorganisa ni Dr. Jay Adalem ng St. Clare College.