CEBU, Philippines - Milampos pagdepensa ang Belgian nga si Kim Clijster sa iyang korona ug midaog sa ikaduhang sunod-sunod nga higayon sa U.S. Open championship ug itakulo ni niyang korona sa maong torneyo human ilang gitumba si Vera Zvonareva sa Russia sa iskor 6-2, 6-1 sulod lang sa 59 minutos sa usa ka makaduka nga duwa ubos sa women’s division didto sa Arthur Ashe Stadium sa Flushing Meadowes sa New York City kaniadtong Sabado sa gabii.
Si Clijsters lang ug si Venus Williams ang mga women’s tennis stars nga nakadaog og duha ka sagunson nga korona sa U.S. Open human kini makab-ot ni Williams sa 2000 ug 2001.
Si Clijsters kinsa mao sab ang kampiyon niadtong 2005, nakahipos na og 21 ka sagunson nga daog. Wala siya mosalmot kaniatong 2006 tungod sa piang ug wala na siya mosalmot bale og duha ka tuig tungod kay magminyo man siya ug nanganak.
Ang iyang dos anyos ug tunga nga anak babaye nga si Jada, didto sab mitan-aw sa atubangang lingkoranan sa Arthur Ashe Stadium diin nagkaon siya og baga kaayong hiwa sa watermelon.
Sa miaging tuig didto sa New York, naglakaw-lakaw lang si Jada palibot sa korte atol sa awarding ceremony, si Clijsters maoy ikaduhang inahan nga midaog ug duha ka major trophies sunod kang Evonne Goolagong Cawley kaniadtong 1980.
Gawas sa iyang nadaog nga sinaw kaayong silver cup, nakadawat sab si Clijsters og 2.2 milyones dolyares—ang champion’s check nga nagkantidad og 1.7 milyones dolyares ug laing 500,000 thousand dollars sa iyang pagtapos isip ikaduha sa U.S. Open Series standings.
“I’ve always felt more comfortable on this surface. Not just this year, but even when I was 14, 15, 16,” sumala pa sa 27 anyos nga si Clijsters. (BANATSPORTS)