Line-up sa cesafi All-Star gibutyag

CEBU, Philippines - Ang mga sigang bitoon nga kasamtangan nagpakita og katakos sa nagpadayong 10th season sa Cebu Schools Athletic Foundation, Inc. (CESAFI) nga molangkub sa umaabot nga East vs. West All-Star games sa collegiate ug sa secondary divisions gibutyag kagahapon sa office of the commissioner pinaagi ni Commissioner Felix O. Tiukinhoy, Jr .

Ang tinuig nga All-Star Games nga mosalida sa labing maayong laking players, ipahigayon karong Septiyembre 19 didto sa Cebu Coliseum sugod ala una sa hapon.

Himoon sab ang traditional nga three-point shoot-out ug slam dunk contest nga maoy molamas sa tinuig nga kalihokan apan gipili pa ang mga partisipante sa maong event ug ipahibalo ra unya sa dili pa moabot ang All-Star games.

Ang East All-Star sa collegiate division pagalangkuban og pito ka players gikan sa nine-time champion University of the Visayas (UV) Green Lancers, upat gikan sa University of San Jose Recoletos (USJR) Jaguars, duha gikan sa University of Southern Philippines-Foundation (USP-F) Panthers ug duha sab gikan sa Cebu Institute of Technology-University (CIT-U) Wildcats ni All-Star coach Gilbert Demape.

Ang kontra gikan sa West All-Star kinsa gipangulohan sa 6-9 nga higanteng si Junemar Fajardo, pagalangkuban og lima ka players sa University of Cebu (UC) Webmasters, lima sab gikan sa University of San Carlos (USC) Warriors, tulo gikan sa Southwestern University (SWU) Cobras ug duha gikan sa Don Bosco Technology Center (DBTC) Greywolves. Ang gipiling coach alang sa West mao si Mike Reyes sa Warriors.

Ang kumpletong line-up alang sa East All-Star magkalip kanilang Adrian Lao, Harold Cincoflores, Emmanuel Calo, Rene Jun Sayson, Ralf Olivares, Phil Mercader ug Jerome Silva gikan sa UV, Kurt Amores, Edwin Bibera, Abulaiz Suliman ug Anecito Lapiz Jr.gikan sa USJR, Ellison Rivera ug Fritz Dajalos gikan sa USPF ug sila si Chester Curso ug Arnel Ipang kinsa mga batos ni Demape sa CIT.

Ang ilang kaatbang gikan sa West maglakip kanilang Fajardo, Kelvin Juliane, Brian Quinton Heruela, Robinson Mohammad ug Krist Edward Pao sa UC, Joven Cid Cortes, Nilton John Otida. Mark Gil Panerio, June Michael Cantonao ug Sam Jordan Hermosa sa USC, Rene Pacquaio, Arrd Evan Diango ug Eleazar Armecin sa SWU ug sila si Jefford Aldave ug Clarito Hernando, Jr. sa DBTC.

Unom ka players sa East All-Star nga gikan sa dominanteng Easternians ni rookie coach Jerry Jaranilla sa topnotcher Cebu Eastern College (CEC) Dragons ang mopasundayag sa ilang abilidad, upat gikan sa UV Baby Lancers, tulo sa USPF Baby Panthers ug duha gikan sa CIT Wildkittens. Ang West ni coach Ramel Rasmo pagalangkuban og upat ka players gikan sa iyang team Sacred Heart School-Ateneo de Cebu Magis Eagles, upat sab gikan sa UC Junior Webmasters, tulo gikan sa USJR Baby Jaguars, tulo sab gikan sa USC Baby Warriors ug bugtong representante gikan sa DBTC Junior Greywolves. Ang makalingaw nga East line-up maglakip kanilang James Neil Sumayang, Nike Montalvo, Benjamin James Zosa, Roy Villarias, Johnmar Lou Regidor ug Mark Anthony Olayon gikan sa CEC, Alwin Aguirre, Gerald Legarde, Vincent Mendoza ug Michael Smith gikan sa UV, Joshua Corcilles, Rommel Diapera ug Richard Paul Gigante gikan sa USPF ug sila si Clyvin Lima-lima ug John Anthony Lucena sa CIT. Ang mas beterano apan underdog nga West team maglakip kanilang Adrian Roland Muller, Adven Jess Diputado, Bradely Brian Bacaltos ug Julius Salvador Cadavis gikan sa SHS-Ateneo de Cebu, Alvin Labolabo, John Raphael Aranas, Adammne Talisic ug Jerick Gel Yburan gikan sa UC, ang magsoong Renzo ug Rendell Senining ug Neriel Magdali gikan sa USJR, Harvey Palapar, Francis Dave Guardiario ug Prince Vaughn Malana gikan sa USC ug si Jose Marlo Pono gikan sa DBTC.

Matag team sa East ug West sa collegiate ug secondary divisions adunay 15 ka players.

Ang East team maoy defending champion sa college ug ang West team maoy defending champion sa high school division. (BANATSPORTS)