USJ-R, USPF, UC daog
CEBU, Philippines - Miposte sa ilang ikatulong sunod-sunod nga daog ang defending men's champion University of San Jose-Recoletos (USJ-R) Spiking Jaguars pinaagi sa pagpukan sa University of the Visayas (UV) sa Cebu Schools Athletic Foundation Inc. (CESAFI) volleyball tournament kagahapon diha sa Aznar Coliseum.
Ang USJ-R ni Cebu Sports Hall of Famer coach Grace Antigua nakasugat pa og kalisdanan una nila maangkon ang kulbahinam nga kadaugan, 30-28, 25-20, 25-21.
Si team captain Leoniel Sanchez maoy nangulo sa kadaugan sa USJ-R uban sa abag ni CHED National Games MVP ug Best Blocker Jesriel Pino, Kevin Casia, James Lawas ug sa ilang bag-ong setter Jayvelle Rojas.
Sa laing duwa, ang University of Southern Philippines Foundation (USPF) mibuntog sa University of San Carlos (USC) sud sa straight sets, 25-16, 25-20, 25-19, samtang ang University of Cebu (UC) nangayo pa og upat ka sets sa wala pa nila buntoga ang Cebu Institute of Technology-University (CIT-U), 23-25, 25-22, 25-17, 25-20.
- Latest
- Trending
