Teletech, Aegis ilog sa 6th Inter-BPO title

CEBU, Philippines - Nahanaw ang pangandoy sa defending champion Convergys alang sa ilang sunod-sunod nga titulo human kini masugamak ngadto sa Teletech Titans, 76-69 sa semifinals sa 6th Inter-BPO basketball tournament diha sa City Sports Club-Cebu gym sa Cebu Business Park.

Sayong mipahungaw sa ilang kainit ang Teletech Titans ug gitapos nila ang unang kuwarter sa iskor nga 24-19. Ang Teletech Titans padayong midiktar sa tiyempo sa duwa aron inaton ang ilang labaw ngadto sa siyete puntos sa halftime, 40-33.

Miaksiyon og gukod ang Convergys sa final period kortesiya nilang Ronald Mabanto ug Darl Ochate sa ilang sunod-sunod nga triples, apan kulang pa ang ilang mga paningkamot pagguba sa solidong depensa sa Teletech Titans kay ang naulahi padayon sa ilang mapintas nga pangatake aron angkonon ang tres puntos nga kadaugan.

Ang Teletech Titans gipangulohan ni Erwin Abellanosa, kinsa miposa og 16 puntos, samtang sila si Sherwin Anghay ug Lourenz Limpangog nagkumboya og 26 puntos.

Sila si Mabanto ug Ochate mikadlit og 20 puntos matag usa alang sa pilderong Convergys.

Sa laing duwa sa semifinal, ang Aegis People Support yano kaayo miposte og daog pinaagi sa paglubong sa Lexmark, 83-63 aron makaangkon sab og luna sa finals.

Grabe kaayo ka impresibo ang Aegis People Support pagsugod dihang miposte kini og 34-11 nga bentaha paghuman sa unang 10 minutos sa duwa. Giinat pa kini ngadto sa 27 puntos sa halftime, 51-24 ug sukad niadto, ang Lexmark wala na makarekober sa lapad nga labaw sa gipanday sa Aegis People Support nga maoy ilang gihimong taytayan paingon sa finals.

Si Clifford Amarado mirehistro og game-high 27 puntos alang sa Aegis People Support. Miabag sab sila si Marvin Roma ug Vincent Barrera nga adunay 14 ug 12 puntos matag usa.

Ang Teletech ug Aegis People Support magbangga alang sa korona pinasikad sa "best-of-three" championship series.