La Salle inilaglag ng AdU

MANILA, Philippines - Nakitaan ng pinakamagandang paglalaro si Kenyan Lionel Manyara upang pamunuan ang Adamson sa 69-64 tagumpay sa La Salle sa pagpapatuloy ng 73rd UAAP men’s basketball kahapon sa Araneta Coliseum.

Ang 6’5 na si Manyara ay hindi napigil matapos huling dumikit sa 59-62 ang Archers sa huling tatlong minuto upang manalo ng malaki ang Falcons at makopo ang ikatlong puwesto sa team standings sa 9-5 karta.

“Malaking bagay ito sa Adamson community dahil nanalo kami sa positioning at may tsansa pang maka­abante sa Finals. Ito rin ang marahil na kauna-unahang pagkakataon para sa Adam­son na manalo ng dalawang sunod sa La Salle sa isang season,” masayang binanggit ni Aus­tria.

Malaking papel ang ginawa ng bagitong si Man­yara na nagtala ng career high na 11 puntos, 17 rebounds, 1 steal at 2 blocks.

Anim na sunod na pun­­tos ang ginawa nito sa huling yugto para maisantabi ang apat na tres na pinakawalan ng Archers upang makabangon buhat sa 57-43 kalamangan na naipundar ng Falcons ma­ta­pos ang ikatlong yugto.

Ang tip-in nga ni Manyara sa sablay na buslo ni Lester Alvarez ang naglayo sa limang puntos sa Falcons.

Nalaglag naman ang Archers sa 8-6 karta at ma­kakalaban nila ang ma­ngu­ngunang koponan sa Final Four na madedeter­mina matapos magtuos ang FEU at Ateneo.

Napagtagumpayan naman ng National University ang pagpantay sa kanilang pinakamagandang karta sa liga sa huling mga taon sa pamamagitan ng 62-54 panalo sa UST sa isa pang laro.

Adamson 69 - Manyara 11, Alvarez 11, Nuyles 9, Cabrera 9, Etrone 8, Canada 8, Camson 7, Stinnett 2, Monteclaro 2, Galinato 2, Brondial 0, Lozada 0.

La Salle 64 - Vosotros 13, Marata 11, Dela Paz 9, Mendoza 8, Andrada 7, Villanueva 4, Webb 3, Reyes 2, Tampus 2, Paredes 2, Atkins 2, Ferdinand 1, Elorde 0.

Quarterscores: 15-18, 33-30, 57-43, 69-64.