Cebu mibawos sa MisOr, nakatabla sa series, 1-1

CEBU, Philippines - Nakatabla ang host M. Lhuillier Kwarta Padala-Cebu Niños dihang ilang gipaluhod ang bisitang Misamis Oriental (MisOr) Meteors, 78-75 sa Game-2 aron tablahon ang series, 1-1 sa Tournament of the Philippines "best-of-five" finals series sa miaging gabii diha sa Cebu Coliseum.

Pas-an ang dakung tahas nga makabawi human sa ilang pait nga kapildihan sa Game-1, ang Niños mihimo og mga kausaban sa depensa aron mapugngan ang mga tirador sa Meteors.

Naglabaw og 11 puntos ang Cebu Niños sa nahabiling dos minutos sa third period, 60-49, apan dali kining napapas sa Meteors human sa mga triples nila ni Patrick Cabahug ug kanhi University of the Visayas (UV) Green Lancers Reed Juntilla aron manipsan pa ang labaw ngadto na lang sa tres puntos, 57-60.

Nahimong pisikal ang duwa tali sa duha ka managribal nga miresulta sa panagtabla, 66-all sa katapusang 6:32 sa duwa, apan ang sentro sa Niños nga si Marlon Basco mipatusak sa iyang tres aron inaton og balik ang ilang labaw.

Ang beteranong si Stephen Padilla, kinsa namugnaw sa iyang opensa, mipasulod sa duha ka free throws nga maoy mihatag og dos puntos nga labaw sa Niños, 77-75 sa katapusang dos minutos sa duwa.

Nausik usab ang kahigayonan sa MisOr nga matabla ang iskor human mabuhii ni Cabahug ang bola nga dali dayong nakuha ni Bruce Dacia, kinsa dali usab nga gi-foul. 

Sa nahabiling 2.4 segundos, mahatod unta sa MisOr ang duwa ngadto sa overtime, apan wala mosulod ang buzzer-beating three point ni Juntilla.

Ang Games 3 ug 4 adto duwaon sa Xavier University gym sa Cagayan, ang balwarte sa Meteors. 

Puntos Matag Usa

Cebu (78) - Cruz 14, Magsumbol 12, Dacia 11, Basco 10, Padilla 8, Baguion 6, Saladaga 6, Santos 5, Mepaña 3, Ababon 4, Nailon 1

MiSOr (75) - Cabahug 19, Juntilla 9, Misa 9, Saldua 8, Daa 8, Lamocha 7, Rañeses 5, Andaya 4, Reguerra 3, Moreño 2, Capati 1, Taganas 1. – BANAT NEWS