CEBU, Philippines - Mibugwak sa ilang kainit ang mangtas nga Cebu Eastern College (CEC) Dragons ug ilang gipahamtangan og 36 puntos nga lubong ang University of San Jose-Recoletos (USJ-R) Baby Jaguars, 97-61 aron moabante sa semifinals kagahapon sa secondary match sa 10th Cebu Schools Athletic Foundation Inc. (CESAFI) basketball event diha sa Cebu Coliseum.
.Ang Dragons magpaabot na lang sa laing tulo ka qualifiers sa semifinals alang sa single round robin series diin balik sa uno ang ilang win-loss records.
Sayong nagmangtas ang Dragons uban ang 18-0 ug ang Baby Jaguars gipatilaw sa unang punto sa split charities ni Ray Leyson sa nahabiling dos minutos sa first period, 1-18 sa motali og 26-4 paghuman sa maong kuwarter.
Ang kuwatro puntos sa first quarter nga nahimo sa Baby Jaguars nahimong CESAFI record nga labing gamay nga puntos sud sa usa kuwarter.
Ang Dragons milabaw og 49-22 sa halftime ug ila pa gipaburot ngadto sa 39 puntos, 87-48 sa nahabiling 5:53 sa fourth period.
Si Nike Montalvo mipabuhagay og 22 puntos aron pangulohan ang Dragons. Si Benjamin James Zosa miabuno og 19 puntos, samtang sila si James Sumayang, Mark Olayon ug Roy Villarias nakakuha sab og double figures alang sa maong kadaugan.
Ang pilderong Baby Jaguars gipangulohan ni Renzo Senining pinaagi sab sa iyang 22 puntos.
Karong adlawa, ang University of the Visayas (UV) Baby Lancers makigsangka sa University of San Carlos (USC) Baby Warriors sa alas-4:30 sa hapon, sundan sa duwa tali sa Southwestern University (SWU) Cobras ug Cebu Institute of Technology-University (CIT-U) Wildcats sas alas-6 sa gabii. – BANAT NEWS