Mga bag-ong dagway sa 10th CESAFI All-Star Games

CEBU, Philippines - Upat ka mga bag-ong coaches -- duha gikan sa collegiate ug laing duha sa secondary ang gitudlong mo-coach alang sa tinuig nga Cebu Schools Athletic Foundation, Inc. (CESAFI) All-Star Games karong Septiyembre 19 diha sa Cebu Coliseum.

Nakadawat sa maong dungog ang nahisgotang upat ka coaches tungod sa ilang gipakitang katakus ug sa kalamposan sa ilang tagsa-tagsa ka teams nga angayan daygon ilabi na gyud ang first-time topnotcher Cebu Eastern College (CEC) Dragons ug second-seeded Sacred Heart School-Ateneo de Cebu (SHS-AdC) Magis Eagles.

Ang coach sa Dragons nga si Jerry Jaranilla maoy motimon sa EAST squad alang sa juniors All-Star nga langkuban sa CEC, UV, CIT ug USPF.

Samtang ang coach sa Magis Eagles nga si Ramil Rasmo mao ang mo-coach sa WEST team nga gibitoonan sa mga magduduwa gikan sa SHS, UC, USC, USJ-R ug DBTC.

Tungod sab sa paghatod ngadto sa Cebu Institute of Technology-University (CIT-U) Wildcats sa talagsaong ikalimang puwesto, ang rookie coach ug ex-pro nga si Gilbert Demape maoy gitahasan nga mo-coach sa EAST All-Star sa collegiate division, samtang si Mike Reyes sa University of San Carlos (USC) Warriors ang modala sa WEST All-Star.    – BANAT NEWS