Niños miluhod sa Meteors

CEBU, Philippines - Naandan na sa Misamis Oriental(MisOr) Meteors ang pagpaluhod sa M. Lhuillier Kwarta Padala-Cebu Niños sa panahon nga mosulong kini dinhi sa Sugbu.

Ang Meteors alkanse og 14 puntos sa third period, apan mipatuman kini og hugot nga depensa ug naghangad sa abilidad ni Mark Andaya hangtod na sa paghuman sa duwa aron pagpukan sa   Niños, 90-87 sa Game-1 sa ilang "best-of-five" finals series sa Tournament of the Philippines (TOP) kagabii diha sa Cebu Coliseum.

Diriyot maperpekto ni Patrick Cabahug ang iyang outside shooting, diin mimasa siya og pito ka triples sa iyang game-high 25 puntos alang sa Meteors. Si Reed Friar Juntilla miamot og 19 puntos, samtang si Neil Rañeses mipabuto og 17 puntos alang sa Meteors, kinsa midiktar sa tiyempo sa duwa.

Makaduha ka higayon nga ang Meteors milabaw og 14 puntos, katapusan   sa iskor nga 58-44 dihang ang Niños mibawos pinaagi sa 23-7 run aron kawaton ang labaw, 67-65 human sa free throw ni Stephen Padilla, usa ka minuto sa dili pa matapos ang third period.

Ang Meteors mibawos sab pinaagi sa 11-0 nga rally aron ilogon og balik ang labaw, 76-67 sa final period.

Gikan niadto, ang duha ka kampo nagsinukliay og mga puntos hangtod nga ang Niños nakatabla, 87-all sa triple ni Marlon Basco sa nahabiling 1:25 sa duwa.

Human mitira og duha ka free throws si Andaya aron hatagan og dos puntos nga labaw ang Meteors, 89-87, ang Niños makahigayon unta pagsakmit sa labaw, apan mikagar ang gibuhiang 3-pointer ni Padilla.

Ang Niños tinguhang mobangon sa ilang kapildihan sa dihang mo-host na sab sila sa Game-2 karong adlawa sa alas-6 sa gabii diha gihapon sa Cebu Coliseum. – BANAT NEWS