CEBU, Philippines - Ang University of San Carlos (USC), Palompon Institute of Technology (PIT) ug newcomer Maria Montessori International School midominar sa tagsa-tagsa nila ka dibisyon sa 12th VISSA Inter-School Swimming Competition and Novice Challenge 2010 didto sa Panglao, Bohol.
Ang USC maoy nanghawod sa secondary division sa ilang 429 puntos, gisundan sa Talisay City Swim team nga adunay 359 puntos, samtang ang Maria Montessori International School mitugpa sa ikatulo sa ilang 284 puntos.
Hinuon, ang Maria Montessori maoy midominar sa elementary level human mihipos og 640 puntos. Ang University of Bohol mipahiluna sa ikaduha sa ilang 594 puntos ug gisundan sa Surigao City Division Swim team nga adunay 248 puntos.
Sa tertiary level, ang Palompon maoy mitungtong sa labing taas nga dapit sa ilang 173 puntos, samtang ang Cristal-3 College 143 pts.) ug ang USC (64 pts.) maoy mi-okupar sa ikaduha ug ikatulo nga dapit.
Gawas sa pagdominar sa elementary level, miani usab og daog si Chloe Alvarez sa Maria Montessori sa 6-under class, samtang si Maynard Sasedor sa USC maoy nag-una sa boys 11-12 class ug si Cynthjune Golden alang sa boys 13-14 level.
Duha usab ka swimmers gikan sa University of Bohol nga sila si John Jose Nelwin ug Nathalie Deanne Fredenburg ang mikulit og personal record sa boys 7-8 division ug sa girls 9-10 class.
Ang pambato sa University of San Jose-Recoletos (USJ-R) nga sila si Lorens Govenechea ug John Beltran mao ang miangkon sa titulo sa 15-17 class.
Wala usab magpauwahi ang taga-Surigao nga sila si Bonel Tandayag ug Kyle Nicole Divinagracia nga maoy midaog sa 18-above boys class ug 9-10 girls category.
Si Chrisante Veloso sa Paref-Springdale maoy miangkon sa boys-9-10, samtang si Camille Shane Pacabis sa Talisay maoy midaog sa 13-14 girls class. (BANAT)