CEBU, Philippines - Gisumpo sa Kamikaze squad ang five-game winning streak sa Mawin's Kitchen pinaagi sa pag-iskor og 72-65 nga upset alang sa ilang ikatulong daog sa nagpadayong MKBC 2010 basketball tournament sa miaging Domingo didto sa Vicente Sotto Memorial Gym sa barangay Punta Princesa, ning dakbayan.
Sa laing duwa, midaog ang Fatima batok sa Panthers, 70-64 sa usa ka come-from-behind nga paagi.
Misaog sab ang Emilmich batok sa Victor Village Residents Association nga gipaluyohan sa GB Taxi, 65-48 samtang ang Demolish midaog nga wala'y nausik pinaagi sa usa ka forfeiture tungod kay wala mopatim-aw ang walay daug-daog nga RJM Power Builders.
Gikan sa ilang 14-13 nga labaw, ang Kamikaze padayong nanginit sa unahan aron molabaw og 13 puntos, 49-36 didto sa third period ug ilang gikontrolar ang duwa gikan gyud sa pagsugod hangtod sa paghuni sa buzzer. Misuway unta pag-rally og makadiyot ang Mawin's apan pakyas sila kay wala na sab sila mag-igo og maayo.
Si Jessie Pacaña maoy nangu sa Kamikaze sa iyang 24 puntos ug si Banjo Bantaya midugang og 12 puntos alang sa 3-3 nga Kamikaze.
Si Sherwin Lequit maoy nangu sa Mawin's Kitchen sa iyang 17 puntos samtang sila si Mt Valejo ug Egin Taborada parehong midugang og 15 puntos matag usa apan naghupot sila'g 5-1 nga baraha.
Ang Fatima gipangulohan nilang Sheila Gonzales ug Jack Echivarria kinsa parehong misakmit og 21 puntos. (BANAT)