Eagles nakabihag na sab

CEBU, Philippines - Krusyal nga short jumper ang napasulod sa utokan nga point guard Adven Jess Diputado sa kataposang 13 segundos nga nagbaswat sa Sacred Heart School-Ateneo de Cebu Magis Eagles ngadto sa makuyaw nga 71-66 nga kadaogan batok sa University of San Jose Recoletos (USJR) Baby Jaguars kaniadtong Sabado sa gabii sa nagpadayong 10th Cebu Schools Athletic Foundation, Inc. (CESAFI) didto sa Cebu Coliseum.

Napapas ang 17 puntos nga labaw sa Magis Eagles, 61-44 sa naghinapos nga oras sa third period ug padayon silang nagsige og labaw og labing menos 10 puntos sulod sa fourth period ug gipakgang ang kainit sa Baby Jaguars pinaagi sa tirada ni Diputado atol sa paghuni sa buzzer nga mao sab ang nahimong insurance points tungod kay igo lang silang naglabaw og tres puntos niadtong tungora, 66-69 may 37 segundos pa ang nahibiling oras human sa duha ka free throws ni Baby Jaguar Neriel Magdali gikan sa foul ni Henry Renzal Asilum.

Dihang nagkinahanglan nang maka-iskor og usab ang Magis Eagles aron pagselyado sa kadaogan, si Diputado maoy mitubag sa tahas aron sumpoon ang Baby Jaguars sa pagsikit og maayo.

Nanghinaut unta ang Baby Jaguars nga mosipyat ang Magis Eagles sa ilang tirada ug andam na sa ilang fastbreak ug may purohan pa ganing makapugos og overtime pinaagi sa three-point basket ilabi na kay nag-igo og maayo niadtong higayona si Renzo Senining apan walay swerte nakabsan na sila sa oras.

Gitapos sa Magis Eagles ang elimination pinaagi sa ilang 6-2 nga baraha ug sa kasamtangan sila maoy pinakadako og quotient aron mahimutang sa ikaduhang pwesto. Daw sa gibati pa og kakapoy ang Magis Eagles human sa ilang 78-63 nga upset victory batok sa mas eksperensiyadong UV Baby Lancers kaniadtong Huwebes.

Nalambigit pa karon sa triple tie ang Magis Eagles tali sa UC Junior Webmasters ug Baby Lancers apan sila maoy labing dako og quotient sa ilang 1.06 puntos kung itandi sa UC nga may .969 ug sa UV nga may .961.

Ang posibilidad ra nga matagak gikan sa ikaduhang pwesto ug modailos sa ikatulong pwesto ang Magis Eagles kung madisgrasya ang Baby Lancers batok sa Baby Jaguars sa kataposan nilang duwa sa elimination.

Nagsugod og rally ang Baby Jaguars sa fourth period ug gihugtan ang ilang depensa aron molampos sa pagsikit ngadto sa 66-69, ang pinakaduol human mawagtang ang ilang 18-17 nga labaw sa first period.

Tungod sa sigeng kisi-kisi matag sipyat sa Magis Eagles ug ilabi na kung dili sila uyon sa tawag sa referees, usa ka dumadapig sa Sacred Heart ang nahulog sa iyang gilingkoran nga monoblock chair ug taud-taud una siyang nakabangon may usa na lang ka minuto ang nahibiling oras sa duwa.

Sa makausa pa, si Adrian Roland Muller mao gihapo’y nangu sa opensa sa Magis Eagles sa iyang 20 puntos samtang si Diputado midugang og 14 puntos ug si Bradley Bacaltos miamot og 12 puntos.

Si Senining maoy nangu sa 1-6 nga Baby Jaguars pinaagi sa iyang 16 puntos, si Julius dela Pena may 13 puntos ug si Magdali may 10 puntos.

Sa sayo pa, si Ron Marvis Dennison mibahug og 15 puntos aron pangulohan ang Baby Lancers ngadto sa ilang 90-65 nga paglubong sa University of Southern Philippines-Foundation (USP-F) Baby Panthers nga gipangulohan ni Rommel Diapera pinaagi sa iyang 20 puntos.

Ang Baby Lancers aduna nay 5-2 nga baraha samtang ang Baby Panthers nagbaton og 3-4 nga baraha. (BANAT)