CEBU, Philippines - Kolor berdi ang maaninaw sa sayong kabuntagon karong adlawa sa pagsikad sa 34th National Milo Marathon-Cebu leg diha sa Cebu City Sports Center (CCSC).
Lahi sa miaging tuig, nakita ni defending Cebu leg female champion Madelyn Carter nga nagkadaghan nga runners karon ang nagtinguha sa pag-ilog sa iyang korona, apan andam siya mosagubang sa mga pagsuway karong adlawa.
Gawas sa pagdepensa sa iyang titulo, laraw usab ni Carter nga mapalambo pa ang iyang personal record sa miaging tuig nga 1:31.18 aron subli niyang maangkon ang kahigayonan nga modagan sa National race karong Disyembre.
Kompiyansa si Carter nga siya gihapon ang modaog sa 21K women's class batok sa ubang top female runners sa Sugbu sama nila ni Mary Joy Tabal sa Southwestern University (SWU) ug ang runner-up sa miaging tuig nga si Jennifer Belocura.
Sa laing bahin, ang defending regional champion sa Milo ug 3rd placer sa National Run nga si Mendel Lopez dili modagan karon nga season tungod sa mga kakulian.
Kini nagpasabot nga bakante karon ang trono sa 21K men's division ug mahimo kining dag-on nila ni Adonis Singson, Joel Delposo, Joebert Carolino ug Phillip Dueñas.
Gawas sa 21K action, liboan usab ka fitness enthusiasts ug mga tinun-an gikan sa nagkadaiyang tunghaan sa siyudad sa Sugbu ang managan sa 10K, 5K ug 3K divisions ning labing daku nga sporting event sa nasud. (BANAT NEWS)