Cebu mo-host na sab sa 2010 Cebu World Dancesport Open

CEBU, Philippines - Modagsa na usab ang mga international dancesport delegates dinhi sa Sugbu aron morampa sa 2010 Cebu World DanceSport Open and 5th Dancesport sa Sugbu karong Septiyembre 26 diha sa Waterfront Cebu City Hotel.

Mga langyaw'ng dancesport athletes gikan sa Bulgaria, Turkey, Australia, Canada, Singapore, Hong Kong ug Korea ang mopakita sa ilang katakus sa sayaw batok sa mga local dancers gikan sa Manila, Makati, Pasay, Baguio, General Santos, Dumaguete, Davao ug multi-titled nga Dancesport Team Cebu City (DTCC).

Sa pagka karon, may 214 na ka paresan ang nagparehistro ug gipaabot pa kining modaghan sa mosunod nga mga adlaw.

Ang DTCC sa pagpangulo ni Edward Hayco, nagtuo nga hinay-hinay nang giila ang Sugbu isip dancesport capital sa nasud human usab sa makasaysayanong pagkulit nila sa Guiness World Record isip “largest dance class” nga gisalmotan og 7,770 ka mga partisipante niadtong Hunyo sa miaging tuig.

Padayon usab karon ang outreach program sa DTCC sa ilang programa nga giulohan og “Dancesport sa Barangay” diin ilang tudloan og dancesports ang kabataan sa nagkadaiyang barangay sa Sugbu. – BANAT NEWS