CEBU, Philippines - Panahon na karon sa mga top amateur boxing prospects sa Cebu City Sports Center (CCSC) stable nga ipakita ang ilang katakus gawas sa Sugbu sa ipahigayong Cebu City-Tagbilaran City Friendship Amateur Boxing Cup didto sa Lindaville sa Tagbilaran.
Ang gikalisangang CCSC boxers dinhi sa Sugbu, manulong sa teritoryo sa ilang kontra aron makigsinukliay og mga kumo ibabaw sa ring ugmang adlawa.
Pinangulohan sa duha ka top amateur boxers sa Kabisay-an nga sila si Allan Refuela ug Ramjes Colina, ang CCSC boxers gilangkuban usab nila ni Junrel Jimenez, Ahlil Ala, John Kenan Villaflor, Nickjoy Bacalso, Rodex Piala, James Castel, Anthony Coral ug Zorro Babel Alsola.
Ang CCSC boxers ubos sa giya ni legendary Olympian ug karon boxing coach Efren Tabanas, gisuportahan usab sa kagamhanan sa siyudad sa Sugbu ug sa Amateur Boxing Association of the Philippines (ABAP). – BANAT NEWS