CEBU, Philippines - Miabante na sa semifinals ang Lexmark ug ang Aegis People Support human gipilde ang ilang tagsa-tagsa ka kaatbang sa ilang duwa sa quarterfinals sa 6th Inter-BPO basketball tournament diha sa City Sports Club-Cebu gym sa Cebu Business Park.
Usa kadto ka dakung dungog alang sa Lexmark kay milampos kini pagbuntog sa "twice-to-beat" nga Qualfon, 77-74.
Ang Qualfon mihimo'g impresibong labok diin gikontrolar nila ang duwa sa first half, 39-37. Padayon silang mipabuhagay og mga puntos hangtod sa third quarter uban ang nuybe puntos nga labaw, 59-50.
Apan kalit nausab ang dagan sa duwa sa final period sa dihang ang Lexmark nakabawi pinaagi sa ilang power plays nga nagtukmod sa koponan ngadto sa tres puntos nga kadaugan.
Si Jake Pia maoy topscorer sa Lexmark uban ang 17 puntos, samtang sila si John Morin ug Giovanni Villahermosa nagkumboya'g 25 puntos.
Ang Qualfon gipangulohan ni Albert Johnston sa iyang game-high 25 puntos, gisundan ni Benjamin Sanchez nga miariya og 16 puntos ug Jophet Regidor nga miambit og 10 puntos.
Sa laing duwa, ang Aegis People Support nakaangkon sab og lingkoranan sa semis pinaagi sa paglubong sa Stream Global, 74-57 sa pagpangulo ni Clifford Amarado, kinsa milansang og 16 puntos. Nakakuha sab siya og maayong suporta gikan nilang Vincent Barrera ug Marvin Roma nga parehong mitimang og double figures.
Si Benjie Mancao mitimbre og 14 puntos aron pangulohan ang pilderong Stream Global.
Ang "best-of-three" semis sugdan ugma uban sa Convergys nga makigsangka sa Teletech, samtang ang Aegis People Support moharong sa Lexmark.
Puntos Matag Usa
Unang duwa:
LEXMARK (77) - Pia 17, Morin 14, Villahermosa 11, Lanzaderas 9, Antiquera 7, Ofondo 7, Perez 5, Bayot 3, Granaderos 2, Saycon 2
QUALFON (74) - Johnston 25, Sanchez 16, Regidor 10, Ignacio 6, Llesol 6, Yap 3, Caballero 2, Cuico 2, Lequigan 2, Requillo 2
Ikaduhang duwa:
AEGIS PEOPLE SUPPORT (74) - Amarado 16, Barrera 14, Roma 12, Arriesgado 8, Caballero 8, Rabuya 7, Nayon 6, Yballe 3
STREAM GLOBAL (57) - Cabrera 12, Flores 11, Mangubat 10, Velasquez 6, Ampong 2, Obina 2. – BANAT NEWS