CEBU, Philippines - Nagpila ang mga dagkung kalihukan sa paugnat sa kusog sa Talisay City dihang gilusad ang Mayor’s Cup Sports Festival 2010 kagahapon sa buntag diha sa Baseline Restaurant.
Ang Mayor's Cup usa sa mga highlight sa nagsingabot nga kapistahan sa ilang mahal nga patron Sta. Teresa de Avila karong Oktubre 15.
Si Hon. Eduardo R. Gullas III, ang labing batan-ong konsehal sa nasud ug chairman sa Committee on Games and Amusement and Professional Sports sa dakbayan sa Talisay, nagkanayon nga usa ka dakung sportsfest ang ilang giandam karong tuiga alang sa mga Talisaynon.
Subhan ang usa ka buwan nga sports events pinaagi sa 2010 Mayor Socrates Fernandez Basketball and Volleyball tournament karong Domingo diha sa Talisay City Sports Complex.
Ang basketball gibuak sa tulo ka dibisyon -- Inter-barangay SK division, Inter-barangay Seniors ug Open (commercial ug collegiate teams).
Mga barangay nga mosalmot sa SK ug Seniors divisions mao ang Lagtang, Linao, Lawaan, Dumlog, San Isidro, Mohon, Lawaan I, Lawaan II, Lawaan III, Pooc, Tabunok, Bulacao, Poblacion Tanke, Jaclupan ug ang defending champions San Roque ug Cansojong.
Sa Open division mao ang Ave Maria Sanctuary Park, Ave Maria-USJR, Aces, UV EXMEN, Mandaue, AC Sports, SIT, Colis, Solmeat ug SWU.
Samtang sa Inter-secondary volleyball tournament, pangulohan kini sa defending champion Sisters of Mary School uban sa Talisay City National High School, St.Scholastica Academy, ACT ug Bulacao National High School.
Si Talisay City Sports Commissioner Jeanneth Villagonzalo miingon nga gawas sa Mayor's Cup, may kompetisyon sab sa inter-school dancesports, cycling ug Gullas Run nga gidumala ni konsehal Rodi Cabigas. – BANAT NEWS