CEBU, Philippines - Agi'g paghinumdom sa ika-132 nga anibersaryo sa adlaw'ng natawhan sa Grand Old Man sa Sugbu nga si Don Sergio Osmeña Sr., ang Cebu City Sports Commission (CCSC) mopahigayon na usab sa tinuig nga DSOS 10K Run karong Septiyembre 9 diha sa Cebu City Sports Center.
Sama sa gihapon, ang mga runners nga mosalmot sa lumba moagi sa karaang dalan dinhi sa Sugbu lakip na sa may Sto. Niño Basilica, diin natawo ang kanhi Sugbuanong presidente sa nasud.
Mga kategoriya nga tigian mao ang 10K men’s ug women’s open ug Masters A (40-45), B (46-50) C (51-55) ug D (56-up).
Dul-an sa P100,000 ang gigahin nga ganti alang sa top 20 placers sa matag kategoriya. Ang kampiyon sa matag kategoriya mobulsa og P10,000 matag usa.
Gisugdan na ang pagpanglista diha sa Cebu City Sports Commission ug aduna kini registration fee nga P200 libre na ang jersey ug race number.
Alang sa dugang mga detalye, mahimo motawag sa Cebu City Sports Commission sa numero 255-6985.
Ang lumba gipasiugdahan sa kagamhanan sa syudad sa Sugbu uban sa suporta sa Prycegas, Waterfresh, Metrografix, CITOM ug ERUF. – BANAT NEWS