21 teams mosalmot sa 2010 Mayor Alegado Fiesta Cup

CEBU, Philippines - Andam na ang tanan alang sa pagbukas sa 2010 Mayor Alegado Cup Fiesta Conference karong Sabado diha sa Consolacion Sports Complex.

Kawhaag-usa (21) ka koponan gikan sa nagkadaiyang barangay sa Consolacion ang mosalmot sa maong torneyo nga molungtad sud sa duha ka buwan. Ang liga usa usab sa mga highlights sa kapistahan sa ilang mahal nga patron San Narciso.

Si sports organizer ug commissioner   Paul Alelu Q. Flores, mipahibalo usab nga molamas sa opening ceremony mao ang pagparada sa mga kandidata sa Miss Consolacion

Mga kategoriya nga tigian sa mga koponan naglakip sa invitational, all-barangay official, inter-barangay A ug B, Sangguniang Kabataan, little mini (12-under), mini (15-under) ug midget (18-under).

Walo ka koponan ang magtigi sa invitational category nga mosubay og double-round robin format sa elimination.

Ang kampiyon makaangkon og P50,000, samtang ang runner-up mobulsa og P20,000.

Gawas sa basketball, laing sports events nga giandam sa organizers mao ang volleyball, dayon-dayon, lawn tennis nga gitukod ni Hon. Ben Ermac ug soccer nga gipangulohan ni Engr. Nilo Ferraren.

Ang tinuig nga sportsfest gisuportahan usab nila ni SK Federation President Hyacinth Herrera, ABC President Gelio Maquilan, executive committee chairman Julius Alegado, event director Engr. Nilo Ferraren ug commissioner Paul Alelu Q. Flores. (BANAT)