Cebu miangkon sa Game-1

CEBU, Philippines - Seryoso ang M. Lhuillier Kwarta Padala-Cebu Niños nga moangkon og lingkoranan sa finals human nila gipaluhod ang Treston Laguna-Stallions, 101-84 sa Game-1 sa ilang "best-of-three" semifinals series sa Tournament of the Philippines kagabii diha sa Cebu Coliseum.

Ang top-seeded Cebu Niños ni team owner Michel J. Lhuillier ug coach Raul 'Yayoy' Alcoseba nagkinahanglan na lang og usa ka daog ug laraw nila nga tapuson ang serye karon sa Game-2 nga sugdan sa alas-6 sa gabii.

Human mipupo og duha ka titulo sa Liga Pilipinas, paningkamotan na usab karon sa Niños nga kab-oton ang ilang damgo nga makuha ang labing unang korona sa Liga Pilipinas-PBL merge league.

Gipakita sa Niños ang ilang pagka-dominante ug ilang gilupig sa pinuntosay ang Laguna nga nakapa-abante kanila og 20 puntos, 91-71 sa nahabiling 5:09 sa duwa.

Sama sa gihapon, ang balanse nga atake sa Niños uban sa ilang makatuok nga depensa ang nahimong yawi sa ilang kadaugan.

Nangulo sa Cebu Niños mao si kanhi University of Visayas (UV) Green Lancers Ariel Mepaña, kinsa miburak og 16 puntos, samtang ang beteranong si Stephen Padilla miabuno'g 14 puntos.

Ang miluhod nga Stallions ni coach Nomar Isla, mag-ampo nga mapilde ang Niños ugma aron mapugos ang serye ngadto sa tinaktakay nga duwa nga adto duwaon sa ilang balwarte. (BANAT)