MANILA, Philippines - Sa kanilang pagbabangga ngayong araw, pag-aagawan ng Far Eastern University at Lyceum ang ikaapat at huling puwesto para sa semifinals round ng ikalawang conference ng Shakey’s V-League Season 7 sa ganap na alas-6 sa The Arena sa San Juan.
Pawang tabla para sa ikaapat at ikalimang puwesto ang Lady Tamaraws at Lady Pirates sa kanilang magkaparehong 5-5 win-loss slate.
Kinakailangang ipanalo ng parehong koponan ang kanilang huling dalawang asignatura kabilang ang larong ito upang masiguro ang kanilang pagpasok sa susunod na bahagi ng season-ending conference ng ligang inorganisa ng Sports Vision.
Pagkatapos ng kanilang banggaan, haharapin ng Lyceum ang NU habang sasagupain ng FEU ang Ateneo sa Huwebes upang tapusin ang kanilang kampanya sa quarterfinals.
Sa iba pang laro, magsusukatan ang Lady Falcons ni coach Dulce Pante at ang NU Bullodgs sa unang laro sa alas-2 ng hapon, habang makikipagbuno ang Lady Stags ni coach Roger Gorayeb sa Ateneo sa alas-4.