Violet kampiyon sa Sunday Basketball Club tilt

CEBU, Philippines - Namunga ang mga paningkamot sa team Violet ni team owner Rolly dela Pieza human mipupo og daog batok sa mortal nga kaaway Yellow team, 97-95 aron pagsakmit sa korona sa Phase 3 Camella Homes Sunday Basketball Club tournament diha sa Villas Magallanes gym sa Sta. Lucia Property sa Lapu-Lapu City.

Naghangak og ginukod ang Violet gikan sa pagsugod sa duwa diin gilubong kini og 10 puntos sa halftime, 40-50.

Imbes nga maluya, ang Violet mipabuhagay hinuon sa ilang kainit hangtod nga nailog nila ang momentum sa tunga-tungang bahin sa fourth quarter luyo sa hiniusang puwersa nilang Centes Brañanola, Ramil Cortes ug Rolly dela Pieza.

Si Brañanola, kinsa maoy nangulo sa mainitong rally sa final period maoy topscorer sa Violet sa iyang 20 puntos, gisundan ni Cortes nga adunay 19 puntos, samtang si Dela Pieza mihipos og 15 puntos.

Nakatabang sab og daku si Bebot Pleños sa maong kadaugan nga miambit og 10 puntos.

Ang pilderong Yellow team gipangulohan ni Alan Sepe, kinsa mibagdok og 25 puntos, si Amay Palay mibahog og 23 puntos. Sila si Roylan Sumilang ug Jun Geraldez nagkumboya og 32 puntos.

Ang awarding ceremony himuon ugma didto sa Kalusoan Island.

Puntos Matag Usa

VIOLET (97) - Brañanola 20, Cortes 19, R. Dela Pieza 15, Pleños 10, D. Dela Pieza 9, Aparente 6, Tongol 4, Balberona 4, Vega 4

YELLOW (95) - Sepe 25, Palad 23, Sumilang 17, Geraldez 15, Villapez 8, Maratas 4. – BANAT NEWS