Fajardo miposte'g season-high 43 puntos

CEBU, Philippines - Halos sa kinatibuk-ang 40 minutos sa duwa nga nagsukarap ug naglisud pag-iskor, ang University of Cebu (UC) Webmasters nakakita og usa ka tawo nga mosulbad ug kini mao si 6-foot-9 Junemar Fajardo.

Si Fajardo, ang labing lig-ong kandidato alang sa MVP race, maayo kaayong nakaduwa diin mipabuto kini og 30 puntos sa iyang season-high 43 puntos sa second half aron pangulohan ang Webmasters ngadto sa 86-79 nga kadaugan batok sa University of Southern Philippines Foundation (USPF) Panthers sa 10th Cebu Schools Athletic Foundation Inc. (CESAFI) basketball event niadtong Martes sa gabii diha sa Cebu Coliseum.

Si Fajardo, ang player   nga kanunay makakubit og foul, nakapasulod og 13 sa 20 niya ka free throws nga daku kaayo’g natabang sa Webmasters ilabi na nga sayong nahimutang sa penalty ang Panthers.

 Naglabaw pa og otso puntos ang Webmasters sa tunga-tungang bahin sa fourth period, 72-64, apan kalit lang kining nahanaw dihang misukli og sunod-sunod nga otso puntos ang Panthers aron tablahon ang iskor sa 72-all sa nahabiling 3:46 sa duwa.

Wala gihapon maka-ginhawa ang Webmasters sa katapusang 38.2 segundos dihang si Fritz Dajalos mihulog og three-pointer aron makitkitan ang labaw ngadto sa tres puntos, 79-82. Apan sila si Fajardo ug Robinson Mohammad milansang sa katapusang kuwatro puntos aron likayan sa UC ang lain na usab untang upset.

Miabag sab ni Fajardo ang playmaker niining si Kevin Juliane, kinsa mitampo og 20 puntos alang sa Webmasters, kinsa nag-inusara sa ikaduhang dapit bitbit ang 5-1 nga baraha.

Si Dajalos maoy nangu sa Panthers pinaagi sa iyang 18 puntos, samtang si Anthony Linao miamot og 14 puntos, gisundan ni Elwin Durano nga mitampo'g 11 puntos.

Ang Panthers ni coach Raul Latonio Sr. nga gihamok og daghang technical fouls padayong nangiwit sa standing uban ang ilang 0-6 nga baraha.