Niños abante semis

CEBU, Philippines - Natuman sa M. Lhuillier Kwarta Padala-Cebu Niños ang duha nila ka tahas nga panimalos ug pagsakmit sa luna sa semifinals, kini human nila gilubong ang MP GenSan Warriors, 93-81 kagabii sa Tournament of the Philippines (TOP) National Playoffs diha sa Cebu Coliseum.

Lab-as pa sa alimpatakan sa Cebu Niños ang gibuhat sa Warriors, kinsa nakaako pagputol sa nagkutay nilang 30 ka daog sa iskor nga 79-74 atol sa Cobra Leg niadtong Hulyo 22.

Tungod niini, naglungot-lungot ang Cebu Niños ni coach Raul 'Yayoy' Alcoseba nga makabawos ug nakita kini kagabii dihang gilupig sa host team ang ilang kaatbang sa tanang departamento lakip na sa rebounding diin mirehistro og 52 ang Niños, itandi sa 42 nga nahimo sa Warriors.

Gikan sa dos puntos nga labaw, 19-17, sa first period, mihinay-hinay og biya ang Niños nga misakmit og double digits nga labaw sa nahabiling 3:39 sa second quarter, 40-30, human sa mga fastbreak plays nila ni Ian Saladaga ug Mark Ababon.

Gidoble kini sa Niños ang labaw ngadto sa 20 puntos, 58-38 sa pagsugod sa third period tungod sa walay hunong nilang rally, ning higayona sa pagpangulo nila ni Ariel Mepaña, Bruce Dacia ug Froilan Baguion kinsa mipauwan sa ilang mga triples.

Gitukod sa Niños ang labing daku nilang labaw sa katapusang 4:41 sa duwa, 66-38, human sa duha ka free throws ni Marlon Basco ug break-away lay-up ni Saladaga ug wala na sila molingi pa sukad niadto.

Pamatuod sa ilang balanse nga atake, tulo ka Niños ang mirehistro og double digits sa pagpangulo ni Saladaga, kinsa miposa og 15 puntos, si Stephen Padilla mirehistro og 12 puntos ug si Abby Santos nga miantog og 11 puntos.

Sa maong kadaugan, ang Niños moatubang sa Treston-Laguna Stallions sa “best-of-three” semifinals series nga gitakda karong Agosto 31.

Si Louie Medalla maoy leading scorer sa Warriors sa iyang 23 puntos, gisundan ni Marvin Yambao nga adunay 13 puntos.