CEBU, Philippines - Parehong mikulit og laing daog ang Litigators ug ang Pecandela Law Firm aron inaton ang ilang winning runs ngadto sa upat ka sagunson nga daog sa 5th Integrated Bar of the Philippines (IBP) 2010 Mayor’s Cup basketball tournament diha sa Capitol Parish gym sa dalan Escario, ning dakbayan.
Ang Litigators mipukan sa walay daug-daog nga Bros ‘N Law, 72-65, samtang ang Pecandela mipakurat sa defending champion Super Idols ni playing coach Erwin Heyrosa sa overtime, 74-70.
Gisugdan sa Litigators ang usa ka mainit nga first quarter ug wala kini mohupas hangtod na ngadto sa final period pinaagi sa pagpangulo ni Lito Ortiz, kinsa mibahog og 21 puntos aron pangulohan ang ilang opensa.
Si Bert Dumon maoy nangu sa Bros ‘N Law pinaagi sa iyang 24 puntos.
Sa sayo pa, ang Pecandela mi-outscored sa Super Idols sa overtime, 13-9 aron moposte’g krusyal nga kadaugan luyo sa trayanggulo nilang Tommy Yu, Francis Pepito ug Jessie Capoy.
Si Benjo Santiago adunay 20 puntos alang sa Super Idols, samtang si Cris Abayon miamot og 17 puntos.
Sa laing duwa, ang Pañeros mibuntog sa Mt. Zion, 63-58 alang sa ilang ikatulong daog sud sa upat ka duwa, samtang ang YLAC nakaipsot sa Iron Eagles, 65-60.