CEBU, Philippines - Panimalos ug ang pag-angkon og lingkoranan sa semifinals maoy bug-at nga misyon sa top seed M.Lhuillier Kwarta Padala-Cebu Niños sa ilang pakigbatok sa MP GenSan Warriors sa pagpadayon sa Tournament of the Philippines (TOP) National Playoffs karong alas-6 sa gabii diha sa Cebu Coliseum.
Gawas sa homecourt advantage, ang Niños ni team owner Michel J. Lhuillier ug coach Raul 'Yayoy' Alcoseba makabaton sab og "twice-to-beat" advantage. Kun ang Warriors modaog, ang winner-take-all match ang mahitabo karong Biyernes diha gihapon sa Cebu Coliseum.
Ang Warriors nakabugto sa nagkadinang 30 ka daog sa Niños pinaagi sa pagpilde sa iskor nga 79-74 atol sa Cobra Leg niadtong Hulyo 22 didto sa Emilio Aguinaldo College sa Manila.
Sa wala pa mahitabo, ang Niños nidaog sa ilang 21 ka mga duwa sa Liga Pilipinas Conference III ingon man ilang unang siyam ka duwa sa TOP, usa ka joint venture sa Philippine Basketball League (PBL) ug Liga Pilipinas nga sanctioned sa Samahang Basketbol ng Pilipinas
(SBP).
Isip paneguro sa ilang kalampusan, ang Niños mikuha sa ex-PBA cager ug produkto sa National University sa Manila nga si Froilan Baguion isip back-up forward uban nila ni Warren Ybañez, Mark Ababon ug Stephen Padilla.
Sa ilang bahin, ang Warriors ni coach Choy del Rosario, magsandig sa ilang mga big men nga naglakip nila ni Christian Nicdao, Arian Daja ug Angelus Raymundo uban sa mga scorer nga sila Jonathan Parreno ug Jonjon Gonzaga.
Ang modaog sa maong serye maoy moatubang sa Treston-Laguna Stallions sa "best-of-three" semifinals series karong Agosto 31.