CEBU, Philippines - Hinay-hinay nang nagpaila ang Sugbuanong si Mercito “No Mercy” Gesta isip usa sa mga kahadlokang boksidor sa 135 lbs. division human niya gipatumba sa round 7 ang Mehikanong si Genaro Trazcanos.
Tungod niini, hayan nga madayun na ang damgo sa undefeated nga si Gesta nga makasangka ibabaw sa ring ang WBO interim champion nga si Michael Katsidis.
Cebu-based Fadai daog nasab
Midaog nasab ang Cebu-based nga si Sabah “Persian Warrior” Fadai human niya balii ang South Korean nga si Doo Jae Jung sa Martial Combat 8 didto sa Singapore .
Si Fadai kinsa nagtungha sa kursong dentistry diha sa Southwestern University (SWU), mikastigo ni Jung sa first round pinaagi sa iyang mga kusug nga kinumo, sa wa pa niya taposa si Jung pinaagi sa submission.
RP Youth 9th placer sa Youth Olympics
Mipahiluna sa ikasiyam nga dapit ang RP team human nila giyatakan ang Central Africa Republic , 22-13, sa 3-on-3 basketball competition sa Youth Olympics didto sa Singapore.
Nangulo sa opensa mao si Jeron Teng kinsa miposa og nuybe puntos alang sa RP Youth nga mitapos sa torneyo nga adunay duha ka daog human sila makahiagum og tulo ka sunod-sunod nga pilde. (BANAT)