MANILA, Philippines - Matapos ang nakatakdang pagdinig bukas ukol sa pag-apela ni Antonio Margarito na makahingi ng boxing license sa California State Athletic Commission (CSAC) ay maghahayag ng kanyang formal statement si Bob Arum ng Top Rank Promotions.
“We’ll have something to announce about where this fight will be by the end of the week,” sabi ni Arum.
Sakaling muling bigyan ng CSAC ng lisensya si Margarito ay maaari nang itakda ni Arum ang laban ng Mexican kay Filipino world seven-division champion Manny Pacquiao sa Nobyembre 13 sa MGM Grand sa Las Vegas, Nevada.
Ang Cowboys Stadium sa Arlington, Texas ang isa ring venue na opsyon ni Arum.
At kung hindi naman mabigyan ng CSAC ng lisensya ang 32-anyos na si Margarito ay inaasahang dadalhin ng 78-anyos na si Arum ang laban sa Abu Dhabi sa United Arab Emirates o sa Monterrey sa Mexico.
Sinabi naman ng Canadian adviser ni Pacquiao na si Michael Koncz na malapit nang pirmahan ng Congressman ng Sarangani ang fight contract nila ni Margarito sa Top Rank.
Matatandaang binawian ng CSAC ng lisensya si Margarito noong Pebrero ng 2009 matapos mapatunayan na naglagay ng ‘plaster-like substance’ sa kanyang handwraps sa kanilang world welterweight fight ni Sugar Shane Mosley noong Enero ng 2009.
Pag-aagawan nina Pacquiao, may 51-3-2 win-loss-draw ring record kasama ang 38 KOs, at Margarito (38-6, 27 KOs) ang bakanteng World Boxing Council (WBC) light middleweight title na binakante ni Sergio Martinez.
Nagmula si Margarito sa isang 10-round, non-title unanimous decision win kay Roberto Garcia noong Mayo sa Mexico.