Nietes Pabiling Kampiyon

CEBU, Philippines - Usa ka kasaysayan ang nakulit ni Donnie “Ahas” Nietes human subli niyang napanalipdan ang iyang WBO minimumweight title sa makatulo ka higayun didto sa Mexico , ning higayuna batok sa Mehikanong si Mario Rodriguez didto sa Auditorio Luis Estrada Medina sa Guasave, Sinaloa, Mexico .

Tulo ka mga hurado ang miiskor pabor ngadto ni Nietes, nagpamatuod lang sa katakus ni Nietes nga mudaog bisan pa sa balwarte sa iyang kontra. Gisugdan ni Nietes ang away pinaagi sa iyang mga hait nga kombinasyon.

Gitubag kini ni Rodriguez og kaugalingon niyang atake, apan kanunay siya nga masangu sa counter-punching ni Nietes kinsa naglawig na sa puntos sa scorecard sa mga judges niadtong tungura.

Atol sa round 8, naigo sa kinumo ni Nietes ang ilong sa Mehikano resulta nga midugo kini, apan imbes nga mahadlok misamot hinuon ka agresibo si Rodriguez ug nakabawus gyud kini pinaagi sa pagisi sa kilay sa ALA boxing champion.

Gitapos ni Rodriguez ang katapusang duha ka round sa iyang mga bangis nga atake, apan naglisud na siya og apas sa taas kaayo nga labaw ni Nietes. Giangkon ni Nietes nga naglisud pud siya sa kakusug sa kumo sa batan-ong Mehikano ug nagpasalamat siya kay husto gyud ang iyang pagpangandam alang sa maong away.

Sa maong kadaugan hapit na maapsi ni Nietes si Luisito Espinosa isip second-longest Pinoy world boxing champion sud sa tulo ka tuig ug lima ka buwan. Labing dugay nga nahimong kampiyon mao si Gabriel “Flash Elorde kinsa mikupot sa super featherweight title sud sa pito ka tuig.

Si Nietes nagkanayon usab nga gusto niya nga sa sunod niyang pagdepensa sa iyang bakus, adto kini ipahigayun sa iyang yutang natawhan sa Bacolod City. (BANAT NEWS)