Proyekto ni gm canete ug comm. Chao sy

CEBU, Philippines - Pareho nakong higala sila si eskrima Supreme Grand Master Ciriaco “Cacoy” Canete ug ang bag-ong natudlo nga commissioner sa Cebu City Sports Commission (CCSC) nga si Lorenzo “Chao” Sy. Daku sab ako’g respeto aning duha ka mga personalidad sa sports tungod kay sa ilang kalambigitan sa sports, nakahatag sila’g kalingawan, kausaban ug kalamboan na nahisgotang natad sa sports nga ilang gipili.

Aron walay magmahay, akong unahan pinaagi sa seniority tungod kay mas maguwang man si Gaw Cacoy ( mao kini ang among tinawganan) kay ni Chao.

Gani didto ako sa ika-91 nga adlaw'ng kasumaran ni Cacoy kaniadtong miaging Domingo, Agosto 8 didto sa ilang panimalay sa C. Padilla din anaa sab mahimutang ang ilang gym ug official headquarters sa Cacoy Doce Pares World Eskrima Federation.

Talagsaon kadtong higayona alang kanako kay kung wala ako masayop, una kadto sulod sa miaging napulo ka tuig kapin nga dinhi sa Sugbo magsa-ulog si Gaw Cacoy sa iyang adlaw'ng natawhan. Kasagaran gud mahitabo, adto siya sa iyang panimalay sa San Jose City, California magsa-ulog kay kanunay siyang tua sa America gikan sa Mayo hangtod na sa Oktubre aron mopahigayon og seminar sa iyang mga langyaw nga miyembro.

Samtang nakighinabi ako kang Gaw Cacoy, miduol kaniya ang iyang mga apo ug pag-umangkon nga nagdala og birthday cake nga may gipatong nga birthday candles “9 ug 1” o 91. Sa wala pa niya huypa ang kandila, dali kaayong migawas ang iyang sense of humor ug ni-ingon siya nga puede bang balihon ngadto sa 19 kay ganahan siyang teenager pa siya.

Nagkapuliki si Gaw Cacoy og dawat og mga email nga nagpadala kaniya’g mga greetings o pahalipya gikan sa iyang mga estudyante sa abroad ug lakip kanila mao si Richard Bustillo, Vince Palumbo, Glenn Gardiner, Chris Nasilowski ug daghan pa kaayo nga wala nako mahinumdumi.

Gikan kang Gaw Cacoy akong nasayran nga aduna siya’y umaabot nga dakung proyekto nga International Mixed Martial Arts seminar ug promotion sa mga sakop sa Doce Pares. Ang tulo ka adlaw nga kalihokan gimoon karong Nobiyembre 12-14 diha sa E-Mall apan ang promotion sa iyang mga sakop adto ipahigayon sa CAP building sa dalan Jones Avenue apan ang seminar ug demonstration adto gyud tanan sa E-Mall.

Adunay gibana-banang 150 ka mga sakop sa Doce Pares nga motambong sa seminar ug kapin sa katunga ang mga langyaw.

Sa Huwebes sa gabii o usa ka adalw sa dili pa ang seminar, sugaton ni Gaw Cacoy ang mga bisita pinaagi sa usa ka welcome banquet didto sa ilang panimalay. Sa Biyernes adunay registration ug sa Sabado ang promotion.

Ang seminar sa Biyernes ug Sabado himoon gikan sa alas 9 sa buntag hangtod sa alas 5 sa hapon ug ang seminar sa Domingo, ang kataposang adlaw, himoon gikan sa alas 12 sa udto hangtod sa alas 5 sa hapon ug ang ubang bisita modretso na sa airport aron mopauli sa ilang tagsa-tagsa ka nasud.

* * *

Sa iyang bahin, ang bag-ong commissioner sa CCSC nga si Chao Sy nagkanayon nga gitahasan siya ni Mayor Michael Rama sa paghan-ay og maayong program aron molambo ang amateur boxing ug pagpangita’g paagi aron makapahigayon og dakung torneyo sa basketball.

Si Chao usa sa labig karaan nga boxing ug basketball promoter ug dunay kasinatian unsay angay buhaton aron dali kining makadani og atensiyon sa publiko.

Niadtong miaging semana, didto si Chao sa Tanza, Cavite diin midaug ang iyang boksidor nga si Arnel Donal, ang no. 8 RP jr. flyweight contender batok sa RP no. 4 contender nga si Cris Ala. Ang maong promotion nga gidala ni Sammy Gello-ani, gipaluyohan sa Tanduay Rhum ug ipakita sa telebisyon karong semanaha.

Matud pa niya nga angayan kanunay nga may amateur boxing promotion aron mabaid og maayo ang mga boksidor ilabi na kadtong wala pa’y mga gikatakdang away kay unsa may gamit kung magsige lang og praktis unya dili ikapakita ang iyang abilidad.

Si Chao mao sa’y gihatagsan ni Mayor Rama nga maoy modumala sa Plaza Sugbo diin siya maoy maniid sa mga kalihokan, legal man o illegal gikan sa may City Hall area hangtod na ngadto sa Plaza Independencia. (BANAT NEWS)