CEBU, Philippines - Napakgang sa defending champion University of the Visayas (UV) Green Lancers ang mainitong rally nga gihimo sa University of Southern Philippines-Foundation (USP-F) Panthers sa naghinapos nga fourth period aron makalikay sa usa unta ka upset ug mi-iskor ug 67-59 nga kadaugan kaniadtong Sabado sa nagpadayong 10th season sa Cebu Schools Athletic Foundation, Inc. (CESAFI) didto sa Cebu Coliseum.
Sa laing duwa, bun-og ang Cebu Institute of Technology (CIT) Wildcats kinsa nawagtangan og duha ka players—ang leading scorer nga si Chester Curso ug ang kasaligang rookie nga si Jose Allan Dimco apan nakalingkawas lang gihapon pinaagi sa pag-iskor ug kulba-hinam nga 94-92 nga kadaugan batok sa nagsangki-ig nga University of San Jose Recoletos (USJR) Jaguars sa usa ka physical game nga nahunong sa duha ka higayon tungod kay diriyot mosangpot sa panag-away.
Na-ejected si Curso nga may 4:09 ang nahibilin sa second period ug ang CIT maoy naglabaw sa iksor, 40-33 dihang kalit mibangon si Curso gikan sa pagkatumba human maigo sa siko ni Renato Abing sa Jaguars ug iya kining gidagan ug gibaslan. Wala makita sa referee ang dukol ni Abing apan tataw ang gibawos nga gihimo ni Curso. Sa may 59.1 segundos ang nahibilin sa dili pa ang halftime, si Dimco na sab maoy nibiya sa korte human kini diriyot mabungi sa kusog nga siko ni Kurt Amores sa Jaguars diin mihagtik daw lipak ang iyang ngabil dihang nasugat sa siko ni Amores atol sa usa ka rebound play ug ang iskor nagtabla sa 43.
Ang coach sa Wildcats nga si Gilbert Demape ug ubang team officials mihulga sa pag-walk out kung dili kontrolahon sa mga referees ang mga second motions ug ilang gibasol ang mga referees nganong gitugotan ang mga ingon niadtong matang sa depensa diin daan nang nagka-initay og gamay silang Curso ug Abing.
Si Curso nag-atubang karon og automatic one game suspension ug dili siya makaduwa ugma batok sa DBTC Greywolves samtang si Dimco kinsang ngabil nagkinahanglan pang tahion, papahuwayon una.
Samtang nabugnaw na ang duha ka habig, gipasulod sa Wildcats ang lima nila ka gagmitoy nga players aron maoy motiwas sa daginotong oras sa second period apan mi-ambit pa gyud makadiyot ang Wildcats nga si Floyd Taboada dihang iyang gi-foul si Amores nga nanghilam-os sa iyang palad.
Ug sa kahadlok nga hibaslan ni Amores, ang inahan ni Taboada nga naglingkod luyo sa bench sa CIT, wala na motugot nga pasudlon og usab ang iyang anak hinungdan nga mikomentaryo si team consultant Alex dela Torre nga kinaiyaha kana sa ginikanan nga panalipdan ang ilang anak apan tungod kay usa man ka player ang iyang anak nga gihatagan og scholarship sa tunghaan, dili sab patas ang maong pag-apil apil sa inahan.
Tingali tungod sa kahimangud ni Dela Torre, iyang gimandoan si Demape nga kung dili siya moduwa, ipatangtang kini sa team. “Aw kung di siya moduwa, papahawa-a na sa team,” matud pa ni Dela Torre.
Nianang pagka third period, mihayag na unta ang tsansa sa Jaguars nga mokulit sa labing una nilang daug tungod kay dali kaayo silang naka-abante og otso puntos, 51-53 apan sa kalit lang sab, napapas ang maong labaw dihang mibalitok ang samaran nga Wildcats kinsa mipabuhagay ug 15-2 run aron mabawi ang labaw, 58-53 lakip sa sagunson nga pito ka puntos ni Ipang kinsa maoy nangu sa opensa sa Wildcats sa iyang 25 puntos.
Ang Jaguars naglabaw og dos puntos, 92-90 human sa duha ka free throws ni Abing may 1:19 ang nahibiling oras sa ikalimang foul ni Kenneth Canete apan ang Wildcats nga maayo kaayo’g depensa, mi-iskor sa kataposang upat ka puntos gikan sa free throw ug duha niini gikan kang Ipang.
Ang Jaguars nga aduna na karo’y labing bati nga record sa CESAFI sa ilang 0-4 nga baraha, gipangulohan ni Amores kinsa mibahug ug 21 puntos ug sila si Benjamin Capillar ug Jun Lapiz may 14 ug 13 puntos, matag usa.
Bag-ohay lang usab napukan ang Jaguars ug sikit nga kapildehan gikan sa mga kamot sa University of San Carlos (USC) Warriors.
Sa sayo pa, si Jerome Silva mi-iksor ug sagunson sayis puntos gikan sa undergoal nga pulos mga stolen play aron baswaton ang Lancers ngadto sa ilang ika-upat nga kadaugan apan si Harold Cincoflores maoy nangu sa opensa sa iyang 12 puntos ug si Silva may otso puntos.
Ang 0-4 Panthers kinsa nakigtabla na sa Jaguars sa kinaubsan, gipangulohan ni Fritz Dajalos sa iyang 11 puntos ug si Lawrence Marano midugang ug 10 puntos. Misikit pa unta ang Panthers sa may 2:41 sa fourth period, 56-60 sa wala pa ang unom ka puntos ni Silva. (BANAT NEWS)