Mandaue boxers pulos nakasulod sa semifinal

CEBU, Philippines – Patas tanan ug pulos mi-abante sa semifinals round ang mga boksidor sa Team Mandaue City human milampos sa tagsa-tagsa nila ka mga sangka sa Congressman Freddie Tinga Cup didto sa Cantada Sport Center sa Taguig City .

Segurado na nga makadala og bronze medal ang mga Mandaue amateur prospects bisan pa og mapakyas sila sa sunod round.

Si Mark Bernaldez nagkaduol na sa iyang damgo nga makahimo og back-to-back championship human niya gipaundang ang pambato sa Misamis Oriental nga si Harmonito Dela Torres sa 57 kgs. division.

Laing duha ka sakop sa Team Mandaue nga sila si Basilio Sultan ug Michael Romarate may purohan na sab karon nga mosakmit og gold medals human sab midaog batok sa ilang mga kaatbang.

Si Sultan midaog sa puntos batok ni Jovito Francisco sa Boracay sa ilang 54 kgs. division, samtang si Romarate mipukan sa taga-Caloocan nga si James Bacho sa 48 kgs. class.

Sila si Sultan ug Romarate mihakot og silvers medals sa miaging tuig.

Sa laing bahin, si Danlou Codilla nga mao pay unang pagsalmot sa torneyo, mipilde ni Ryan Tesorio sa Palawan sa 46 kgs. category.

Ang flyweight nga si Albert Pagara midaog usab pinaagi sa referee stoppage human niya kulataha si Noriel Pellio sa Boracay.

Sa semis, si Codilla moharong sa pambato sa Mandaluyong nga si Jonas Bacho, samtang si Romarate makigsangka ni Michael Enriquez sa MisOr ug si Pagara makigbinukbukay ni Fil-Japanese Jarada Katsuya sa Misamis Oriental.

Sangkaon ni Sultan si Harold Serapion sa Caloocan, samtang si Bernaldez makigsinukliay og kumo sa Boholanong si Juniel Maligno. (BANAT NEWS)